Դեսպանատան հայտարարության տողատակը...

Հետընտրական շրջանում մեծ աղմուկ հանած ՍԱՍ-ի «քվեների ժողովի» ձայնագրությանը արձագանքեց նաև մեր երկրում ԱՄՆ դեսպանատունը: ԱՄՆ դեսպանատան արձագանքում ողջունվում էր հրապարակված ձայնագրության փաստի հանդեպ Գլխավոր դատախազության ուշադրությունը եւ քննություն սկսելու մասին հայտարարությունը:

Դեսպանատան հայտարարության մեջ ուշագրավ էր վարչապետ Կարեն Կարապետյանի անվան հիշատակումը: «Այս բնույթի արժանահավատ ու թափանցիկ քննությունները համահունչ են փետրվարի 9-ին վարչական ռեսուրսի օգտագործման դեմ վարչապետի հնչեցրած նախազգուշացման հետ: Մենք հավատացած ենք, որ կառավարությունը կապահովի, որպեսզի չլինեն հակընդդեմ մեղադրանքներ կամ հաշվեհարդար որեւէ անձի կամ կազմակերպության դեմ, որը քննությանը կներկայացնի արժանահավատ տեղեկություններ», ասված է ԱՄՆ դեսպանատան հայտարարության մեջ:

ԱՄՆ հայտարարության մեջ տեղ է գտել ինչպես նախազգուշացում, այնպես էլ վարչապետ Կարեն Կարապետյանին աջակցելու ԱՄՆ պատրաստակամությունը: Որևէ մեկի համար գաղտնիք չէ ԱՄՆ իշխանությունների վերաբերմունքը ՀՀ մի շարք օդիոզ քաղաքական գործիչների և բիզնես շրջանակի ներկայացուցիչների հանդեպ: Բանը կարող է հասնել անգամ Հայաստանի համար «Մագնիտսկու ցուցակի» տարբերակի կիրառմանը:

Իր հերթին Կարապետյանը պետք է ցույց տա տնտեսական արդյունք, ինչը դժվար թե իրականություն դառնա առանց համակարգային փոփոխության միտում ունեցող գործողությունների: Իսկ դա ակնհայտորեն հարվածելու է տնտեսական մի շարք շրջանակների, որոնք էլ կազմում են ՀՀԿ ռեյտինգայինների մի զգալի հատվածը: ԱՄՆ-ն փաստացի իր աջակցությունն է հայտնում Կարեն Կարապետյանին սույն անցանկալի ռեյտինգայինների հետ պայքարի հարցում: Բայց այս դեպքում հարց է առաջանում՝ կկտրի՞ արդյոք վարչապետը այն ճյուղը, որի վրա նստած է: Թերևս՝ ոչ:

Եվ հենց իրադարձությունների նման զարգացումներին է վերաբերվում ԱՄՆ դեսպանատան հայտարարության տողատակում առկա նախազգուշացումը: Եթե վարչապետը կորցնի խոսքը գործով ապացուցելու հնարավորությունը ապա կարող է լուրջ կասկած առաջանալ նրա՝ իրական, խորքային և համակարգային բարեփոխման գնալու ցանկության հարցում:

Ստելլա ԽԱՉԱՏՐՅԱՆ