«Մագնիտսկու ցուցակ» Հայաստանի համա՞ր...

Հետընտրական գործընթացներում բացահայտվող ընտրակեղծիքների ֆոնին վերջին օրերին տարածվում են տեղեկություններ, որ Արևմուտքում կարող է կազմվել հայ օլիգարխների ցուցակ, որոնց մուտքը կարգելվի ԱՄՆ և Եվրամիություն, ինչպես նաև կարող են նրանց նկատմամբ կիրառվել որոշ տնտեսական պատժամիջոցներ:

Փաստորեն Արևմուտքը փորձեր է կատարում աշխարհաքաղաքական նկատառումներից ելնելով՝ ճնշում գործադրել ՀՀ իշխանությունների վրա: Անշուշտ, դժվար թե արևմտյան գործընկերներին հուզող գլխավոր խնդիրը՝ մեր երկրում օրեցօր խորացող կոռուպցիան է և քաղաքական մշակույթի բաղադրիչ դարձած ընտրակեղծարարությունը: Արևմուտքի գերխնդիրը նման ցուցակների միջոցով ՀՀ իշխանություններին ռուսական ազդեցության գոտուց քիչ թե շատ դուրս բերելն է: Փաստացի մեր հանդեպ կիրառվելու է նույն պատժամիջոցը, ինչը՝ կիրառվեց նաև Ռուսաստանի պարագայում:

«Մագնիտսկու ցուցակն», ինչպես հայտնի է, Ռուսաստանի պաշտոնյաների հանդեպ կիրառեց ԱՄՆ-ը՝ արգելելով մուտք գործել իր տարածք այն պաշտոնյաներին, որոնք առնչություն են ունեցել Մագնիտսկու գործին, որը խոշոր կոռուպցիոն բացահայտումներին էր վերաբերում: Փաստորեն ավելի և ավելի մոտ է այն պահը, երբ Հայաստանի համար կկազմվի ևս մեկ «Մագնիտսկու ցուցակ»:

Ահա թե ինչու Հայաստանի շահը պահանջում է սկսված այդ գործընթացի անհապաղ հրապարակայնացում, որպեսզի տեղի ունեցածը չօգտագործվի Հայաստանի վրա ճնշում բանեցնելու համար: Այսինքն՝ ստեղծված իրավիճակում Հայաստանի հասարակության խնդիրն է օգտագործել հնարավորությունը և հասնել նրան, որ սկսված որոշակի գործընթացը անհապաղ հրապարակայնացվի, ինչով կերաշխավորվի, որ այն ծառայելու է Հայաստանի հասարակության շահին:

Շատ լավ է, եթե արևմուտքը կօգնի Հայաստանի հասարակությանը թեկուզ ինչ-որ չափով լուծել կոռումպացված մեծ ու փոքր պաշտոնյաներին բացահայտելու և պատասխանատվության ենթարկելու հարցը: Բայց, եթե այդ պաշտոնյաները արևմուտքի ձեռքին դառնալու են արդեն Հայաստանին և նրա հասարակությանը որևէ բան պարտադրելու գործիք, ապա դա, իհարկե, պետք է կանխվի, առավել ևս, որ այդ դեպքում կոռուպցիոներների պատասխանատվության մասին խոսք չի լինի, այլ ընդամենը՝ նրանց մի թեթև օգտագործելու:

Ստելլա ԽԱՉԱՏՐՅԱՆ