Բանից անտեղյակ է...

Այն, որ Երևանում հասարարական տրանսպորտի վիճակը շարունակում է անմխիթար մնալ, որևէ մեկի համար գաղտնիք չէ: Գաղտնիք չէ նաև այն, որ կառավարությունը, ի դեմս վարչապետի՝ վերջին մեկ ամսվա ընթացքում կենտրոնացել էր երկրում առկա տրանսպորտային ցանցի բարեփոխման անհրաժեշտության մասին հայտարարությունների և համապատասխան հանձնարարականների վրա:

Սակայն բանից պարզվում է, որ հարցի պատասխանը՝ ե՞րբ ի վերջո կտեսնենք տրանսպորտի համակարգի բարեփոխում, չգիտեն անգամ ոլորտի պատասխանատուները: Մասնավորապես, Երևանի քաղաքապետարանի տրանսպորտի վարչության պետ Հենրիկ Նավասարդյանը չգիտի, չի կարող ասել, և ընդհանրապես տեղյակ չէ, թե երբ կարելի է ակնկալել Երևանի տրանսպորտի ցանցի բարեփոխմանը:

Միակ հստակությունը, որ այս հարցում ունեն պատկան մարմինները, այն է, որ աշխատանքներ են տարվում: Թե ինչ աշխատանքներ են, որոնց արդյունքը, արդեն տարիներ շարունակ՝ պատիվ չունենք տեսնելու՝ դժվար է ասել: Այս հարցի առնչությամբ բազմիցս ամենաբարձր մակարդակով հայտարարվել է, որ քաղաքային երթուղիների ցանցի բարելավման հարցը ժամ առաջ պետք է լուծել, և անհրաժեշտ են համալիր մոտեցումներ ու համագործակցություն՝ բոլոր շահագրգիռ կողմերի հետ:

Իսկ մինչ բանից անտեղյակ պաշտոնյաները փաստացի վիժեցնում են այդ խնդրի լուծումը, Երևանի տրանսպորտի և ճանապարհների վիճակը հեռու և բավարար լինելուց։ Երևանի տրանսպորտային ցանցի Էֆեկտիվ կառավարման դեպքում կգտնվեն դոնորներ, ովքեր գումարներ կտրամադրեն երթուղային գծերի, Մետրոպոլիտենի ու Երևանը շրջանցող ճանապարհների կառուցման ու արդիականացման համար: Ինչպես նշում էր վարչապետ Կարապետյանը՝ ոլորտի պատասխանատուների հետ հանդիպման ընթացքում, պետք է կարճ ժամանակահատվածում խաղի կանոնները սահմանել սկզբունքային, ռադիկալ կերպով, երկարատև հորիզոնով: Վարչապետը հորդորում ու հորդորում է, պարոն Նավասարդյանը ո՛չ բարեփոխումներից է տեղյակ, ո՛չ բարեփոխումների ժամանակահատվածներից, ո՛չ էլ խաղի կանոններից: Բարեփոխումնե՞ր… Չէ՛: Չե՛նք լսել:

Ստելլա ԽԱՉԱՏՐՅԱՆ