Բլեֆը...

ՀՀ կառավարության այս շաբաթվա նիստի օրակարգում է կազինոների եւ ինտերնետային շահումով խաղերի «ակտիվ» մասնակիցների նույնականացման վերաբերյալ որոշման մի նախագիծ: Խոսքն ավելի քան 1 միլիոն դրամի խաղադրույք անողների մասին է:

Ըստ որոշման նախագծի՝ բոլոր կազինոները եւ ինտերնետային շահումով խաղերի կազմակերպիչները այս տարվա հուլիսի 1-ից պարտավոր են լինելու գրանցել մեկ միլիոն եւ ավելի խաղադրույք կատարող անձանց, ունենալ նրանց ճշգրիտ տվյալները, պահել նրանց անձը հաստատող փաստաթղթերի պատճենները:

Սակայն որոշման նախագծից պարզ չեն դառնում այն մեխանիզմները, որոնք թույլ չեն տա կազմակերպիչներին՝ խուսափել նման պարտավորությունից: Այսինքն՝ հասկանալի չէ, թե ինչպես կարող են պատկան մարմինները վերահսկել, թե արդյո՞ք կազինոյի աշխատակիցները գրանցեցին խոշոր խաղադրույք իրականացրած այս կամ այն պաշտոնյայի անձնական տվյալները: Այս որոշման ընդունումը կառավարությունը հիմնավորում է փողերի լվացման դեմ պայքարի ուղղությամբ իրականացվող միջոցառումներով: Նախագծին հպանցիկ ծանոթությունն անգամ մի շարք տրամաբանական հարցեր է առաջացնում:

Օրինակ, որո՞նք են լինելու այն մեխանիզմները, որոնց շնորհիվ կկանխվի սույն կազպակերպությունների կողմից պատասխանատվությունից խուսափելու մտադրությունը: Նախագծում նման մեխանիզմների մասին չի հիշատակվում, իսկ ինքը ծրագիրը՝ ավելի շատ նման է բարի ցանկության, քան փորձագիտական հենք ունեցող նախագծի, որը թույլ կտա փակել ոլորտում առկա բացերը: Նման թերի նախագծերը չեն կարող համակարգող և կարգավորիչ դեր ունենալ:

Մյուս հարցը՝ արդյոք կառավարությունում չե՞ն մտածել, որ ուղեղի ծալքերը մի փոքր աշխատեցնելու արդյունքում հնարավոր կլինի կատարել ոչ թե 1 միլիոնի, այլ, ասենք, 999 հազարի խաղադրույք և ազատվել ավելորդ ու անցանկալի վերահսկումից: Սրանք ընդամենը մի քանիսն են այն հարցերից, որոնք առաջանում են սույն նախագծին ծանոթանալիս: Այս բոլոր հարցերին պետք է ծրագրային պատասխաններ տրվեն, հակառակ պարագայում՝ սա դիտարկվելու է իբրև հերթական «թոզ փչոցին», որը ոչ այլ ինչ է, քան կեղտոտ փողերի դեմ պայքարի պարզ և պրիմիտիվ իմիտացիա….

Ստելլա ԽԱՉԱՏՐՅԱՆ