Նոր բիզնես խաղ Marketingclub-ից

Բիզնես խաղեր կազմակերպվում են աշխարհի տարբեր երկրներում: Գոյություն ունեն տարբեր տեսակի և տարբեր խնդիրներ լուծող նմանատիպ ծրագրեր: Ոչ ֆորմալ կրթական ոլորտում նույնպես օգտագործվում է բիզնեսի սիմուլյացիոն միջավայր հանդիսացող այս ինտերակտիվ միջոցը: «Մարքեթինգի հայկական ակումբ»-ը օրերս տեղեկատվություն էր տարածել, ըստ որի, իրենց կողմից մշակվել է ՀՀ գինիների շուկայի վերաբերյալ «Business game» ձևաչափի խաղ: Ըստ հաղաորդագրության` առաջիկայում խաղը հասանելի կլինի հանրային լայն շերտերի համար: Թեմայի շուրջ ԼՈւՐԵՐ.com-ը զրուցել է «Մարքեթինգի հայկական ակումբ»-ի նախագահ Տարոն Պարսամյանի հետ:

-Ինչո՞ւ որոշեցիք նման նախաձեռնությամբ հանդես գալ և ի՞նչ խնդիրներ եք լուծում սրանով:

Դեռևս 2013 թվականին մենք մշակել էինք ՀՀ ձկնաբուծության ոլորտի վերաբերյալ բիզնես խաղ: Նման ծրագրերը հնարավորություն են տալիս երիտասարդ մասնակիցներին՝ հետաքրքիր ժամանցը համատեղել օգտակար ու խորքային գիտելիքներ ստանալու գործընթացի հետ: Խաղի ընթացքում մասնակիցները ծանոթանում են իրական շուկայում տիրող իրավիճակին, օրենսդրական դաշտին, գնագոյացման, հարկային առանձնահատկություններին և այլն… ՀՀ գինիների շուկայի վերաբերյալ «Business game» կազմակերպելու միջոցով խնդիր ունենք երիտասարդների համար ստեղծել մոտիվացիոն ամպ, որտեղ վերջիններս խորքային գիտելիքներ կստանան: Ակումբը ոչ ֆորմալ կրթական ծրագրեր է իրականացնում մարքեթինգի ոլորտում, ուստի՝ սա մեր հերթական նախաձեռնություններից մեկն է:

-Ի՞նչ մեթոդներով է մշակվել խաղը:

Խաղը մշակվել է հայ գինեգործների գործնական առաջարկների, երկրորդային տեղեկատվության հավաքագրման մեթոդով կուտակած տեղեկատվության և ակումբի' նմանատիպ ծրագրեր կազմկերպելու փորձի համադրության արդյունքում: Իհարկե, բոլոր փակագծերը կբացվեն խաղի մեկնարկի վերաբերյալ հաղորդագրությունը տարածելուց հետո, բայց վստահ կարող եմ ասել, որ ամեն ինչ արվել է, որպեսզի մասնակիցների համար այն անցնի հետաքրքիր, ժամանակակից միջավայրում և ունենա խորքային, բովանդակային օգտակարություն:

-Մրցանակներ լինելո՞ւ են:

Այո, իհա՛րկե: Այս մասին առավել մանրամասն՝ մեկնարկն ազդարարող հաղորդագրության մեջ կնշվի:

-Պետության կամ մասնավորի կողմից աջակցություն ակնկալվո՞ւմ է:

«Մարքեթինգի հայկական ակումբ»-ը ինքնաֆինանսավորվող, կոմերցիոն գործունեություն չծավալող կազմակերպություն է: Մեր բոլոր ծրագրերն իրականացվում են առանց հովանավորների աջակցության: Չեմ կարծում, որ մարքեթինգի ոլորտի մասնագետներից բաղկացած մասնագիտական համայնքին պատիվ կբերեր ընդհանրապես սեփական բյուջե չունենալը: Ո՛չ, ֆինանսավորողներ չկան, իրականացնում ենք մեր ուժերով: Նպատակ ունենք հանրային օգտակարություն ստեղծել ու չափելի ցուցանիշներով հիմնավորել մշակած ծրագրի ոչ ֆորմալ կրթական նշանակությունը:

-Ինչպե՞ս կարելի է մասնակցել ծրագրին:

Մասնակցության վերաբերյալ մանրամասները շուտով հասանելի կլինեն մեր ֆեյսբուքյան էջում: Հետաքրքրվողներին խորհուրդ կտամ հետևել Armenian Marketing Club ֆեյսբուքյան էջին, որտեղ մի քանի օրից տեղադրվելու է մեկնարկն ազդարարող հաղորդագրությունը:

Սոնա Հարությունյան