Ստամբուլով գլուխներս բարձր գնում էինք` «Արմենիա» մարզաշապիկներով. Հակոբ Սերոբյանն ամփոփեց մարմնամարզիկների ելույթները

Ընդհանուր առմամբ՝ հավաքականի մասնակցությունը Եվրոպայի առաջնությանը՝ գնահատում ենք բավարար: Այս մասին ԼՈւՐԵՐ.com-ի թղթակցի փոխանցմամբ՝ լրագրողների հետ զրույցում այսօր՝ ապրիլի 26-ին ասաց Հայաստանի մարմնամարզության հավաքականի գլխավոր մարզիչ Հակոբ Սերոբյանը:

Ամփոփելով ռումինական Կլյուժ քաղաքում անցկացված մարմնամարզության Եվրոպայի առաջնությունը, մարզիչը խոսեց մեր մարզիկների ելույթների մասին.

«Ընդհանուր առմամբ՝ հավաքականի մասնակցությունը գնահատում ենք բավարար: Կան տղաներ, որ շատ արդարացրեցին, կան տղաներ, որ՝ ոչ այնքան: Շատ գոհ եմ Հարություն Մերդինյանից. նման վնասվածքից հետո  ցույց տվեց, որ կարող է ամեն ինչ անել: Աշխարհի առաջնությունում ավելի բարդ վարժություն ենք իրականացնելու: Երկու օրն էլ նա իր վարժությունը կատարել է: Մրցակցությունը շատ ուժեղ էր:

Դավթյան Արթուրի համար ամենաբարդն էր: Նա մասնակցեց երեք օր: Բազմամարտում բարելավեց իր արդյունքները: Արթուրը եզրափակչում ավելի լավ հանդես եկավ: Նրանից էլ շատ գոհ եմ:

Դժգոհ եմ Թովմասյան Արթուրից: Եզրափակչում նա ցատկը լավ չկատարեց, չգիտենք՝ նրա հետ ինչ կատարվեց:

Դավթյան Վահագնը իր վարժությունները կատարեց այնպես, ինչպես կարողացավ: Սա շատ մեծ փորձություն էր:  

Երիտասարդներից Խաչատրյան Վիգենից դժգոհ եմ. զարմանալիորեն՝ նա չէր անում այն, ինչի պատրաստ էր, այն, ինչ կարող էր:

Արմեն Պետրոսյանն արեց իր ուժերին համապատասխան:

Մենք մեդալ սպասում էինք: Մեր փորձառուն` Մերդինյանը, արդարացրեց մեր սպասումները:

Ստամբուլով էինք գնում և նաև Ստամբուլով վերադարձանք: Ապրիլի 24-ն էր,  գլուխներսս բարձր  գնում էինք «Արմենիա» գրությամբ մեր մարզշապիկներով, բոլորը շնորհավորում էին»:

Մարզիչը նշեց, որ աշխարհի առաջնությանը կմասնակցեն Հարություն Մերդինյանը, Վահագն Դավթյանը, Արթուր Դավթյանը: Դրանից բացի՝ Արթուր Թովմասյանն ու Արթուր Դավթյանը կմասնակցեն նաև համաշխարհային ուսանողական խաղերին:

Լիանա Թովմասյան