Ռուսական կողմը չի տրամադրել Պերմյակովի՝ զորամասը ինքնակամ լքելու փաստով քրգործի նյութերը

Ավետիսյանների իրավահաջորդի ներկայացուցիչ, ՀՔԱ Վանաձորի գրասենյակի փաստաբան Արայիկ Զալյանը 2017 թ. հունիսի 23-ին գրությամբ դիմել է ՀՀ Քննչական կոմիտե՝ Ավետիսյանների ընտանիքի անդամների սպանության գործով դատապարտված Վ. Պերմյակովի՝ զորամասն ինքնակամ լքելու մասին ՀՀ իրավապահներին անհապաղ չհայտնելու հիմքով ռազմաբազայի պատասխանատու անձանց նկատմամբ ծառայողական քննության իրականացման և դրա արդյունքների վերաբերյալ տեղեկություններ ստանալու նպատակով:

ՀՔԱ Վանաձորի գրասենյակից հայտնում են, որ ՀՀ Քննչական կոմիտեի պետի տեղակալ Ս. Տոնոյանը դեռևս 2015 թ. նոյեմբերի 16-ին նշված փաստով ծառայողական քննություն իրականացնելու հանձնարարական էր տվել ռուսական 102-րդ ռազմաբազայի հրամանատարությանը: ՀՔԱ Վանաձորի գրասենյակի փաստաբանի կոնկրետ հարցադրումներին ՀՀ Քննչական կոմիտեի ՀԿԳ ավագ քննիչ Գ. Աղաբաբյանը 2017 թ. հուլիսի 3-ի գրությամբ պատասխանում է. «Որոշ զինծառայողներ [….] ենթարկվել են կարգապահական պատասխանատվության, իսկ մի շարք այլ զինծառայողներ ենթարկվել են քրեական պատասխանատվության»:

Մինչդեռ հարցմամբ հստակ տեղեկատվություն էր պահանջվել, թե որ գործողության համար և ինչ պատասխանատվության են ենթարկվել խախտում կատարած զինծառայողները: Ինչ վերաբերում է Վ. Պերմյակովի՝ զորամասն ինքնակամ լքելու վերաբերյալ ՌԴ իրավապահների և ռազմական դատարանի կողմից քննված քրեական գործի նյութերի պատճենների տրամադրմանը, ավագ քննիչ Գ. Աղաբաբյանը պատասխանում է . «[….] Վ. Պերմյակովի կողմից զորամասն ինքնագլուխ լքելու և մի շարք այլ հանգամանքների և մեղադրանքների շուրջ ՌԴ իրավապահ մարմինների կողմից քննված քրեական գործը ՀՀ որևէ իրավապահ մարմնի կողմից պահանջվելուն, հայտնում եմ, որ [….] Ս. Ավետիսյանի և նրա ընտանիքի անդամների սպանության կատարման համար մեղադրվող Վ. Պերմյակովի վերաբերյալ քրեական գործը ստացվել է [….] և միացվել [….] քրեական գործին, որն էլեկտրոնային տարբերակով տրամադրվել է տուժողի իրավահաջորդի ներկայացուցիչներին»: Մինչդեռ, տուժողի իրավահաջորդի ներկայացուցիչներին տրամադրվել են միայն Ավետիսյանների ընտանիքի սպանության փաստով ՌԴ իրավապահների իրականացրած քննության նյութերը: