Ամառային նորաձևության գույներն ու ձևերը․ դիզայների խորհուրդները

 

«Այսօր այնքան լայն է հագուստի ընտրությունը, ասել՝ ինչ-որ բան նորաձև է, ինչ-որ բան ոչ` սխալ է: Նորաձև է ամեն ինչ. ամեն չափ, ամեն լայնք։ Ինձ համար կարևոր մի բան կա․ նորաձև է անհատականությունը, որը տարբերվում է մասսայից»,- մեզ հետ զրույցում ասաց Արամ Նիկոլյանը: 

 

Դիզայների կարծիքով՝ հիմա չկա մի ուղղություն, որը կբնորոշի այս ժամանակշրջանը․ «Եթե ասում ենք 60-ականներ, անմիջապես պատկերացնում ենք հիպիական ուղղություն, հիմա չկա դա և դժվար է ասել կոնկրետ որևէ բան, որն այժմ նորաձև է»:

 

Անդրադառնալով այս ամռան նորաձև գույներին, կտորներին ու նախշերին, Նիկոլյանը նշեց, որ նորաձև են համարվում պաստելային, սառը գույները․ «Շատ են հանդիպում ծաղիկներով, զոլերով նախշերը: Նորաձև կտորները ևս շատ տարբեր են․ նախապատվությունը կարելի է տալ թեթև, պարզ, եթերային ֆակտուրաներից մինչև տրիկոտաժե, բամբակե կտորներին»,- ասաց դիզայները:

 

Նրա խոսքով՝ այժմ հասարկության մեջ շատ են տարբերվող և հետաքրքիր հագնվող մարդիկ․ «Առօրյայում խորհուրդ եմ տալիս գրագետ հագնվել: Շատ հաճախ հանդիպում ենք մարդկանց, ովքեր այնքան ծանր են հագնվում, որ ոչ թե իրենք են կրում հագուստը, այլ հագուստն է կրում իրենց: Ճիշտ, գրագետ ու տեղին հագնվելն ավելի կարևոր է, քան նորաձև լինելը»,- ընդգծեց նա։