Մրցույթներ, մրցանակներ, աստղային հյուրեր, համեղ հյուրասիրություն. հուլիսի 15-ին կանցկացվի Ձմերուկի փառատոն

«Երևանյան ամառ 2017» միջոցառումների ծրագրով Կարապի լճի հարակից տարածքում հուլիսի 15-ին կանցկացվի «Ձմերուկի»  5-րդ՝ արդեն ավանդական դարձած փառատոնը: Այս տարին փառատոնի համար հոբելյանական է, հետևաբար այն ներկայանում է առավել ընդգրկուն կազմով: Երևանի քաղաքապետարանի տուրիզմի բաժնի պետ Գևորգ Օրբելյանը նշեց, որ միջոցառմանն ընդգրկված են լինելու հայկական շոու բիզնեսի ներկայացուցիչները:

Միջոցառման ընթացքում 12 վարչական շրջանների տաղավարներում մասնագետները կներկայացնեն ձմերուկ մատուցելու ու ձևավորելու յուրօրինակ տարբերակներ: Փառատոնի ամբողջ ընթացքը կուղեկցվի հայտնի ու սիրված երգիչ-երգչուհիների մասնակցությամբ համերգային ծրագրով: Բացի այդ, հենց երգիչ-երգչուհիները կկազմակերպեն ձմերուկի հյուրասիրություն իրենց պատկերացրած ձևով:

«Այսօր կարող ենք ասել, որ Ձմերուկի փառատոնն իր ուրույն տեղն ունի փառատոնների շրջանում: Այն սպասված է հասարակության շրջանում: Հետաքրքիր ժամանակ են անցկացնում թե մայրաքաղաքի բնակիչները, թե հյուրերը: Փառատոնն ամառային այս օրերին Երևանին է փոխանցում յուրահատուկ վառ գույներ ու ուրախ տրամադրություն»,-ասաց Գևորգ Օրբելյանը:

Այդ օրը միջոցառումներով հագեցած է լինելու: Մասնավորապես ժամը 16:00-ից 17:00-ն տեղի կունենա շքերթ- դիմակահանդես, ֆլեշ մոբ, ժամը 17:00-19:00-ն տեղի կունենա փառատոնի բացման հանդիսավոր արարողությունը, կլինեն մրցույթներ, հյուրասիրություն: Արդեն 19:00-ից մինչև 22:00-ն կլինի երաժշտություն, համերգ, ուրախ խաղեր: