Ջավախքը Սփյուռք չէ

Այսօր մամուլի «Արմատ» ակումբում տեղի ունեցավ մամլո ասուլիս՝ «Սարդարապատ» շարժման և «Կուր–Արաքս» հիմնադրամի ներկայացուցիչներ Ալեք Ենիգոմշյանի ու Տիգրան Խզմալյանի մասնակցությամբ։ Ասուլիսի թեման ջավախահայ քաղաքական գործիչ, այսօր արդեն քաղբանտարկյալ Վահագն Չախալյանն էր։

Խնդրելով պատմել Չախալյանի գործի նախապատմությունը՝ ասուլիսավարն սկսվեց ասուլիսը։ Սակայն Խզմալյանը բացատրեց, որ նախապատմությունից առաջ ցանկանում է տալ նախանախապատմություն։ Այն է՝ Չախալյանի ու Դինքի համեմատականը։

«Երբ հրանտ Դինքը ողջ էր, մեզանից քչերն էին նրան ճանաչում։ Հիմա մենք կարող ենք կուրծք ծեծել, հիմնադրամներ հիմնել ու ասել, որ Հրանտ Դինքը մեր դրոշն է։ Իմ խորին համոզմամբ՝ Չախալյանը հայ ժողովրդի համար Հրանտ Դինքն է այսօր։ Մենք պետք է գիտակցենք, որ հարևան պետությունում կա մի հայ քաղբանտարկյալ, ով անգամ բանտից գլխավորում է ջավախքահայության խնդիրները՝ բնիկ ժողովուրդ լինելու, իրենց լեզվի, իրենց կրոնի, իրենց հավատքի համար»,– ասաց Տիգրան Խզմալյանը։

«Իհարկե՝ ջավախքահայերը Խորհրդային միության փլուզումից հետո միառժամանակ ոգևորություն ապրեցին, սակայն դա հետո մարեց։ Եթե 90–ականներին քիչ թե շատ հնարավոր էր պահպանել հայկականությունը Ջավախքում, ապա 2000–ականներին վրացիները փոխեցին իրենց դիրքորոշումը, իսկ Հայաստանի կառավարությունն սկսեց ավելի թույլ քաղաքականություն վարել՝ ընդհուպ Ջավախքը Սփյուռք կոչելու»,– շարունակեց Ենիգոմշյանը։

Հիշեցնենք, որ Չախալյանը ձերբակալվել է 2008 թ.-ին՝ Վրաստանի իշխանությունների կողմից, այս պահին գտնվում է Ռուսթավի համար 6` խիստ ռեժիմի բանտում, որտեղ հատկապես նրա կենցաղային պայմաններն են խիստ։ Նա «Միասնական Ջավախք» կուսակցության հիմնադիրն էր Ջավախքում։