Հայ եւ ռուս երիտասարդների համագործակցությունը՝ Երրորդ հայ-ռուսական երիտասարդական ֆորումի շրջանակներում

Հասարակություն 4 Հոկտեմբեր, 2017 14:57

Այսօր՝ հոկտեմբերի 4-ին, «Պոստ Սկրիպտում» մամուլի ակումբում, ՌԴ Ռազմավարական ծրագրերի կենտրոնի ղեկավար Ելենա Գոդովիխը, Ռուսաստանի գիտության եւ մշակույթի ռուսական կենտրոնի ներկայացուցիչ Սոսե Մարտիրոսյանը, Հայ-ռուսական երիտասարդական միասնության փոխնախագահ Սերգեյ Վարդազարյանը եւ «Worldskills Russia» ասոցիացիայի գլխավոր տնօրենի տեղակալ Դմիտրի Գլուշկոն խոսեցին հայ եւ ռուս երիտասարդ գործարարների հետաքրքրությունների եւ համատեղ ներդրումային ծրագրերի մասին: Անդրադարձ կատարվեց նաեւ Երեւանում կայանալիք Երրորդ հայ-ռուսական երիտասարդական ֆորումին:

«Worldskills Russia» ասոցիացիայի գլխավոր տնօրենի տեղակալ Դմիտրի Գլուշկոն նշեց, որ Հայաստանի հետ համագործակցությունն առաջին հերթին կառուցվում է Ռուսաստանի, Հայաստանի, Ղազախստանի եւ Բելառուսի կողմից Աստանայում կայացած ֆորումի ժամանակ ստորագրված համաձայանգրով, որով ստեղծվել է «Eurasia Skills»-ը: Այն նպատակ ունի զարգացնել, մշակել եւ պատրաստել մասնագետների, որը հնարավորություն կտա ունենալ ավելի որակյալ աշխատակազմ: Երիտասարդների համար սա հիանալի տարբերակ է՝ իրենց մասնագիտական գիտելիքները զարգացնելու եւ նոր, ժամանակակից տեխնոլոգիաներով աշխատելու համար:

Հայ-ռուսական երիտասարդական միասնության փոխնախագահ Սերգեյ Վարդազարյանը փաստեց, որ նման համագործակցություններն անխոս կարեւոր են, քանի որ որակյալ կադրերի պատրաստումը կարեւոր է ոչ միայն Հայաստանի, այլ՝ ամբողջ աշխարհի համար: «Որակյալ եւ պրոֆեսիոնալ կադրերի պակասը գնալով ավելի է զգացվում: Ֆորումի ժամանակ տարբեր սեկցիաներ կգործեն՝ IT, տնտեսական եւ այլն, որտեղ կքննարկվեն կարեւոր հարցեր՝ գործատուների, գործարարների, շահագրգիրռ անձանց հետաքրքրող»,-նշեց Սերգեյ Վարդազարյանը:

ՌԴ Ռազմավարական ծրագրերի կենտրոնի ղեկավար Ելենա Գոդովիխը նշեց, որ յուրաքանչյուր երկրի համար շարժիչ ուժ է հանդիսանում հենց երիտասարդությունը, ուստի կարեւոր է, որ նրանք ստանան պրոֆեսիոնալ որակավորում, իմանան մեր ազգերի մշակույթը, արդյունավետ կերպով շփվեն եւ համագործակցեն միմյանց հետ: «Իհարկե, այս գործընթացներում կարեւորում ենք Ռուսաստանի գիտության եւ մշակույթի ռուսական կենտրոնի հսկայածավալ աշխատանքը, որը մշտապես աջակցում է տարբեր միջոցառումների կազմակերպման հարցում»,-նշեց Ելենա Գոդովիխը:

Կենտրոնի ներկայացուցիչ Սոսե Մարտիրոսյանը կարեւորելով համագործակցության ոլորտները, նշեց, որ հայ եւ ռուս երիտասարդները պետք է հասկանան, թե որքան կարեւոր եւ թանկ են համագործակցության շրջանակները: Իսկ նման ֆորումների անցկացումը եւս վառ ապացույցն է՝ արդյունավետ համագործակցության:

Հարցին, թե հայ եւ ռուս երիտասարդներին ինչ է տալիս համատեղ աշխատանքը եւ ինչ ոլորտի ծրագրեր են ներկայացվում ու քննարկվում, Ելենա Գոդովիխը նշեց. «Կարող եմ ասել, որ այս տարիների ընթացքում, ինչ համատեղ աշխատում ենք՝ երիտասարդների հետաքրքրությունը գնալով ավելանում է: Երիտասարդները կարողանում են ներկայացնել իրենց արդեն պատրաստի նախագծերը կամ գաղափարները, որոնք նրանք կարող են համատեղ իրականացնել: Դրանք տնտեսական, հումանիտար, հայրենասիրական, կոմերցիոն նախագծեր են, որոնք համագործակցության ընթացքում քննարկվում, մշակվում եւ ներկայացվում են: Շատ ուրախալի է հատկապես այն փաստը, որ գործնական համագործակցության շրջանակը վերածվում է ընկերական եւ անգամ ընտանեկան լավ հարաբերությունների»:

Ֆորումի մասին խոսելով Ելենա Գոդովիխը կարեւորեց նաեւ բանախոսներին: Վերջիններս տնտեսագետներ, քաղաքագետներ, եւ այլ ոլորտի ներկայացուցիչներ են, ովքեր իրենց փորձով ու գիտելիքներով կիսվում են մասնակիցների հետ:

Հավելենք, որ միջոցառումներն այս տարի անցկացվելու են Եվրասիական համագործակցության Երկրորդ Միջազգային ֆորումի հետ համատեղ: Երիտասարդական ֆորումն ուղղված է Ռուսաստանի եւ Հայաստանի երիտասարդության համախմբմանը եւ ամրապնդմանը, եվրասիական ինտեգրման գաղափարների եւ արժեքների առաջխաղացմանը: Վերոհիշյալ միջոցառումը կազմակերպում է Մոսկվայի հայ երիտասարդության ասոցիացիան` Ռուսաստանի տնտեսական զարգացման նախարարության աջակցությամբ: Հիմնական կազմակերպչական գործընկեր է հանդիսանում «Հայ-ռուսական երիտասարդական միասնությունը»:

Ֆորումի անցկացման գործընկերներն են համարվում նաև Հումանիտար զարգացման Միջազգային հասարակական կազմակերպությունը, «Ինտեգրում և զարգացում» հասարակական կազմակերպությունը, Ռուս-հայկական երիտասարդության ալյանսը:

Նախագիծն իրականացվում է պետության միջոցներով`Ռուսաստանի Դաշնության նախագահի կողմից տրամադրված քաղաքացիական հասարակության զարգացմանն ուղղված դրամաշնորհի տեսքով՝ ընձեռնված Նախագահական դրամաշնորհների ֆոնդի կողմից:

Ֆորումի մասնակիցում են ուսանողներ, մագիստրոսներ, ասպիրանտներ, Ռուսաստանի եւ Հայաստանի հասարակական կազմակերպությունների ակտիվիստներ․ մոտ 200-ից ավել մարդ:

Միջոցառման ծրագրի համաձայն` անցկացվելու է լիակազմ նիստ`Ռուսաստանի եւ Հայաստանի պետական իշխանության մարմինների ներկայացուցիչների, փորձագետների, ինչպես նաեւ` հասարակության կարծիքի, բիզնես-կառուցվածքների առաջնորդների մասնակցությամբ թեմատիկ սեկցիաներ: Լիակազմ նիստի շրջանակներում քննարկվելու են Եվրասիական տնտեսության միության երկրների միասնական տեղեկատվական տարածության ստեղծման արդյունքները եւ զարգացման միտումները, եվրասիական ինտեգրման հումանիտար կողմերը, թվային տնտեսությունը, կադրերի պատրաստման ժամանակակից պահանջները, եվրասիական տարածության աշխատուժը:

Ֆորումի շրջանակներում անցկացվելու է Ռուսաստանի եւ Հայաստանի երիտասարդության հումանիտար եւ մշակութային համագործակցության ոլորտի նորարարական գաղափարների մրցույթ: