Նոր մանրամասներ Երևանում հնչած կրակոցների գործով. Ջոնին ինքն է խոշոր չափի գումար պարտք եղել իր զոհին (տեսանյութ)

Հայաստանի քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնի հատկապես կարևոր գործերով ավագ քննիչ Արսեն Արմենակյանի որոշմամբ Երևանում ավտոմատ հրազենի գործադրմամբ աղմկահարույց սպանության գործով նշանակվել են մի շարք փորձաքննություններ։

Փորձաքննություն է նշանակվել հայտնաբերված ավտոմատի փաստով, այն է՝ նշանակվել է դատահետքաբանական, դատաձգաբանական, մատնադրոշմային և այլն։

Սպանությունից օրեր անց էլեկտրոնային որոշ լրատվամիջոցներ, հղում անելով իրենց «լավատեղյակ» աղբյուրներին, նշում էին, որ սպանվածը խոշոր չափի գումար է պարտք եղել սպանության կատարելու կասկածանքով միջազգային հետախուզման մեջ գտնվող Հաղթանակ թաղամասի 3-րդ փողոցի 32 տան բնակիչ՝ 31-ամյա Կարեն Մինասյանին։

shamshyan.com-ի տվյալներով՝ կան կասկածներ, որ զարհուրելի այս սպանությունը Կ. Մինասյանը, ում թե՛ թաղամասում, թե՛ իր ընկերական շրջապատում ավելի շատ ճանաչում են «Ջոնի» մականվամբ, տարիներ առաջ Հաղթանակ (հանրության կողմից ավելի շատ 4-րդ գյուղ անունը կրող) թաղամասում դեղատուն բացելու նպատակով իր զոհից, ով նաև իր ազգականն է, 25 հազար ԱՄՆ դոլար է խնդրում ու քանի որ Արշակի մոտ եղել է գումար, նա առանց երկմտելու, որպես բարի կամքի դրսևորում, համաձայնվել է գումարը տալ Ջոնիին։

Վերջինս էլ խոստացել է՝ ասելով. «Դեղատունը սարքելուց հետո այն գրավ կդնեմ ու գումարը կվերադարձնեմ»։

Գումարը ստանալուց հետո դեղատունը կառուցել է, սակայն ամեն անգամ խոստացված գումարը վերադարձնելու պահը սարքել է «ռսի զավտռա», ինչից հետո սկսել է վատանալ ազգականների հարաբերությունները։

Արդեն գումարի վերադարձնելու գործին խառնվել են մի քանի մարդիկ, ովքեր պարզել են, որ իրականում Ջոնը իր քայլով փորձում է «քցել» Արշակին և ստիպել են գումարի մի մասը մաս-մաս վերադարձնել՝ ընդհանուր մնալով մոտ 13 հազար ԱՄՆ դոլար։

Անցել են ամիսներ, և Արշակը հանդիպում է Կ. Մինասյանին, ով ոչ տանում, ոչ բերում է՝ Արշակին հայտնում է, որ ինքը իրեն փող չունի տալու։ Արշակն էլ իր ընկերների ու մտերիմների հետ պայմանավորվում են, որ օրեր անց պետք է հանդիպեն Ջոնիին ու պարզաբանեն, թե ինչու է նա չոր արտահայտվել՝ ասելով, թե՝ «գումար չունեմ տալու»։ 

Սակայն «շաբաթը ուրբաթից շուտ է գալիս». Ջոնին, ով թաղամասում այնքան էլ բարի համբավ չունի, վախենալով, որ թաղամասի «լավ տղերքը կփչացնեն իրեն»՝ խոստումը չկատարելու համար, պլանավորած կատարում է իր սև գործը։

shamshyan.com-ը հայտնում է նաև, որ հանցագործությունը հնարավոր է եղել օպերատիվորեն բացահայտել՝ շնորհիվ տեսախցիկների արձանագրած կադրերի։ Կադրերում երևում է, թե ինչպես է Ջոնին Nissan-ով գալիս, կանգնում հանցանքի վայրում, ապա ավտոմատով կրակոցներ արձակում իր զոհի ուղղությամբ և ուղղություն է վերցնում դեպի «Զվարթնոց» օդանավակայան, տոմս գնում և «չվում» Ռուսաստան։

Հանցագործությունն օժանդակելու համար կալանավորված Հաղթանակ թաղամասի 1-ին փողոցի բնակչ, 23-ամյա Դավիթ Եղոյանը նույնպես Ջոնիի բարեկամն է։ 

Հիշեցնենք՝ «Ջոնի» մականվամբ Կարեն Մինասյանը սպանության կասկածանքով միջազգային հետախուզման մեջ է:

Առավել մանրամասն՝  սկզբնաղբյուր կայքում: