Վրաստանում բողոքի ակցիաներ են, պահանջում են վարչապետի և ՆԳ նախարարի հրաժարականները (տեսանյութ)

Վրաստանի մայրաքաղաք Թբիլիսիում հազարավոր մարդիկ դուրս են եկել փողոց՝ բողոքելով մայրաքաղաքի երկու հայտնի գիշերային ակումբներում ոստիկանության իրականացրած գործողությունների դեմ, որոնք ոմանք համարում են ոստիկանության կողմից անհամաչափ ուժի կիրառում:

Նրանք պահանջում են վարչապետի և ներքին գործերի նախարարի հրաժարականը:

Ներքին գործերի նախարարությունը հայտարարել է, որ հայտնի «Բասիանի» և «Կաֆե Գելըրի» ակումբներում երեկ գիշերն իրականացված այդ գործողությունների արդյունքում ձերբակալել է ենթադրաբար թմրանյութերի վաճառքով զբաղվող 8 մարդու:

Վերջին շաբաթներին Թբիլիսիում թմրանյութերի օգտագործման հետևանքով մի քանի մարդ է մահացել:

Ցույցի կազմակերպիչներից մեկը` Դաթո Գաբունիան, հանրահավաքի հարթակից դիմելով Թբիլիսիի քաղաքապետ Կախա Կալաձեին, հայտարարում էր․ «Կախա՛, տե՛ս, քաղաքն այլևս քոնը չէ, այս քաղաքն ամբողջությամբ կաթվածահար է»:

Ցույցերի կազմակերպիչը 2014-ին ստեղծված «Թեթրի խմաուրի» («Սպիտակ աղմուկ») կազմակերպությունն է, որը հանդես է գալիս Վրաստանում թեթև թմրամիջոցների օրինականացման և թմրամիջոցների հանդեպ պետական քաղաքականության ազատականացման օգտին: Կազմակերպության անդամ Բեկա Ցիկարիշվիլիի համոզմամբ՝ Վրաստանի իշխանությունները նման գործողություններով փորձում են երկրում վախի մթնոլորտ հաստատել:

«Մեր համոզմամբ՝ տարիների շարունակ այս երկրի գլխավոր խնդիրը եղել է ոստիկանական պետության առկայությունն ու ոստիկանների անպատժելիությունը: Մայիսի 12-ի մղձավանջը այդ ոստիկանական պետության ևս մեկ դրսևորումն էր: Դա նաև հասարակության որոշակի խմբերին ահաբեկելու փորձ էր: Մեր համոզմամբ՝ տեղի ունեցածը ուժի ցուցադրություն էր, որ ուղեկցվեց մարդու իրավունքների զանգվածային ոտնահարմամբ»,- նշում էր Ցիկարիշվիլին: