Հորդորում եմ դադարեցնել ստահոդ տեղեկությունների տարածումը. նախարար (տեսանյութ)

ՀՀ տարածքային կառավարման և զարգացման նախարար Սուրեն Պապիկյանը ֆեյսբուքյան իր էջի ուղիղ եթերում նշել է, որ տարբեր մարդկանց անուններ են հնչում, թե իբր այդ մարդիկ պատրաստվում են շարժման կողմից նշանակվել մարզպետներ: Ապա հիշեցրել է, որ ըստ Սահմանադրության, մարզպետներին նշանակում է կառավարությունը՝ վարչապետի առաջարկությամբ:

«Ինչպես մյուս նշանակումները, վստահ եղեք, որ վարչապետը կկատարի ճիշտ ընտրություն և դուք կունենանք այնպիսի պաշտոնյաներ, որոնք ամենայն պատասխանատվությամբ կկրեն իրենց ուսերին դրված բեռը: Այն խնդիրները, որ փորձում են առաջացնել, իրականության հետ կապ չունեն: Չեմ ուզում անդրադառնալ, թե ինչ անձերի շուրջ կան խոսակցություններ:

Վերջին մեկ շաբաթվա ընթացքում տարբեր քաղաքացիներ, շարժման անունից հանդես գալով, գնում են գյուղապետարաններ և պահանջում նրանց հրաժարականը: Ես ի պաշտոնե, ամենայն պատասխանատվությամբ հայտարարում եմ, որ շարժման օրակարգում այդպիսի քայլեր չկան: Բոլոր նրանք, որոնք առանց մեզ հետ համաձայնեցնելու կատարել են նման քայլեր, հորդորում եմ դադարեցնել ստահոդ տեղեկությունների տարածումը:

Երեկ և առաջին օրը առաջին փոխվարչապետ Արարատ Միրզոյանի մոտ ունեցանք խորհրդակցություններ՝ կաթի գնի հետ կապված: Արժանին պիտի մաւոտցենք այն տնտեսվարողներին, որոնք լսելով փոխվարչապետի հորդորը, գնացին զիջման և հայտարարեցին, որ կաթի գինը կմնա նույնը: Խնդրում եմ այլևս դադարեցնել փողոցների փակման միջոցով նմանատիպ հարցերի հնչեցումը, որովհետև այս կառավարությունը այլևս հասանելի է Հայաստանի յուրաքանչյուր քաղաքացու: Շուտով կունենանք նաև մարզպետներ և խնդրանքս է՝ դիմել մեզ և խնդրի կարգավորումը օրինական ճանապարհով տեղի կունենա: մենք ձեր բոլոր խնդիրներին կփորձենք հնարովինս օպտիմալ ձևով լուծում գտնել»,-ասաց նա: