Մի խումբ վանաձորցիներ նոր կառավարությունից պահանջում են Սամվել Դիլոյանի գործի վերանայում

Մի խումբ վանաձորցիներ երեկ բողոքի ցույց են անցկացրել Վանաձորի «Արցախ» պուրակում՝ ի պաշտպանություն 12 տարով անազատության մեջ հայտնված Սամվել Դիլոյանի։ Նրանց համոզմամբ, Դիլոյանը դատապարտվել է ակնհայտ անհիմն։ Ցույցի մասնակիցները երթով շարժվել են դեպի ԵԼՔ դաշինքի՝ Վանաձորի կենտրոնական գրասենյակ, որտեղ փոխմարզպետ Արամ Խաչատրյանը, ով ՔՊ կուսակցության տեղական կառույցի ղեկավարն է, հանդիպել է քաղաքացիների հետ։ Նա նշել է, որ դատական համակարգին որևէ միջամտություն չի կարող լինել, բայց եթե կան ակնհայտ ապօրինություններ, ապա նման ապօրինություններ իրականացնող պաշտոնյաները պետք է ենթարկվեն պատասխանատվության։ Նա խոստացել է հանրության  վրդովմունքը փոխանցել համապատասխան իրավասու անձանց։ 

ԼՈւՐԵՐ․com-ի հետ զրույցում փաստաբան Ռուբեն Հակոբյանը նշեց, որ դատաքննության ընթացքում Սամվել Դիլոյանի անմեղությունը հաստատվել էր, բայց դրան հակառակ՝ կայացվել է մեղադրական ակտ։

«Տեղի է ունեցել իշխանափոխություն, և իշխանությունները հանրության կարծիքը հաշվի են առնում, և հույս է ծագել, որ նոր իշխանությունները կվերանայեն գործերը։ Նոր իշխանություններին ապավինելով՝ հույս ունեն գործը վերանայել»,-ասաց Հակոբյանը։

Հիշեցնենք, որ 2012-ի նոյեմբերի 18-ին՝ փաստաբան Սամվել Շարբաթյանի մահվան դեպքի առթիվ խմբակային սպանության և խմբակային խուլիգանության հոդվածներով մի քանի տարի մեղադրանքը պնդելուց հետո, դատախազությունը հրաժարվել էր իր իսկ առաջադրած՝ երեք մեղադրյալների վերաբերյալ խուլիգանության, նրանցից մեկի վերաբերյալ՝ նաև սպանության մեղադրանքից: