ՀՔԾ պետը՝ Ռոբերտ Քոչարյանին հարցաքննության հրավիրելու մասին (տեսանյութ)

Ինչպես արդեն տեղեկացրել ենք՝ ՀՔԾ-ն Մարտի 1-ի գործով ծանուցագիր է ուղարկել Երկրորդ նախագահ Ռոբերտ Քոչարյանին հարցաքննության հրավիրելու համար։ Այս մասին այսօր լրագրողների հետ զրույցում հաստատեց նաև ՀՔԾ պետ Սասուն Խաչատրյանը:

Նա հորդորեց իրեն չուղղել հարցը, թե արդյո՞ք ծանուցագիրը տեղ հասել է, թե՞ ոչ, նշեց՝ Քոչարյանը հարցաքննության հրավիրվել է որպես վկա։

«Ես չեմ կարող գաղտնազերծել մեր գործողությունների հաջորդականությունը, դա քննչական տակտիկա է»,- ասաց նա՝ անդրադառնալով հարցին՝ հնարավոր է Քոչարյանի նկատմամբ հետախուզում հայտարարվի:

Նրա խոսքով՝ հարցաքննության հրավիրվելու են բոլոր նրանք, ովքեր կարող են որևէ տվյալ հայտնել Մարտի 1-ի գործով. «Որևէ կաշկանդվածություն՝ կապված անունների հետ, զբաղեցրած պաշտոնների հետ չկա»,-նշեց Խաչատրյանը:

Հիշեցնենք՝ 2008 Մարտի 1-ին տեղի ունեցած իրադարձությունների ժամանակ Հայաստանի նախագահը Ռոբերտ Քոչարյանն էր:

ՀՔԾ պետի պարզաբանեց նաև՝ ինչպե՞ս են Պաշտպանության նախկին նախարար Միքայել Հարությունյանին մեղադրանք առաջադրել մի հոդվածով, որը 2008-ին գոյություն չի ունեցել․ «Այն մեկնաբանությունները, որոնք տալիս են որոշ իրավաբաններ, թե գործը հարուցվել է մի հոդվածով, որը գոյություն չի ունեցել, մեղմ ասած, ոչ կոմպետենտ մեկնաբանություններ են, որովհետև այդ արարքը՝ սահմանադրության տապալումը, գոյություն է ունեցել նաև 2008 թվականին, պարզապես այն նախատեսված է եղել մեկ այլ հոդվածով: Ընդամենը նախատեսված է եղել 300 հոդվածով, հետագայում այս հոդվածի դիսպոզիցիայից այս գործողությունը հանվել և նախատեսվել է 301.1 հոդվածով։ Ընդամնեը փոխվել է հոդվածի համարը»,- ասաց Խաչատրյանը։