Ուշիի ոլորաններում КамАЗ-ով վթարի ենթարկված ՌԴ քաղաքացին հիվանդանոցում մահացել է

Օրեր առաջ Աշտարակի բժշկական կենտրոնում մահացել է Ռուսաստանի քաղաքացի՝ Դիգորսկիի մարզի բնակիչ, 41-ամյա Թեմուր Գազալովը։

Shamshyan.com-ի  փոխանցմամբ, վերջինս հիվանդանոց էր տեղափոխվել 2018 թվականի դեկտեմբերի 25-ին Ուշիի ոլորաններում իր վարած КамАЗ մակնիշի P 159 A123 համարանիշի ավտոմեքենայով վթարի ենթարկվելուց հետո։

Մինչ կողաշրջվելը, նրա ավտոմեքենան բախվել էր 33-ամյա Արարատ Հ.-ի վարած Audi մակնիշի ավտոմեքենային։

Ավելի վաղ  հայտնի էր, որ դեկտեմբերի 25-ին խոշոր ավտովթար էր տեղի ունեցել Արագածոտնի մարզում։ Ժամը 13։30-ի սահմաններում КамАЗ մակնիշի ռուսական համարանիշներով ավտոմեքենայի վարորդը Երեւան-Վանաձոր ավտոճանապարհի Ուշիի ոլորաններում՝ դեպի Երեւան ընթանալիս դուրս էր եկել ճանապարհի երթեւեկելի գոտուց, բախվել երկաթբետոնե արգելապատնեշներին, այնուհետեւ առաջ ընթանալով՝ բախվել Audi մակնիշի 34 DF 696 համարանիշի ավտոմեքենային եւ կրկին առաջ ընթանալով՝ բախվել նորից երկաթբետոնե արգելապատնեշներին, այնուհետեւ բախվել մի քանի ծառերի ու հայտնվել բնակչին պատկանող այգում։

Վթարի հետեւանքով КамАЗ-ի վարորդը մարմնական վնասվածքներով տեղափոխվել էր Աշտարակի բժշկական կենտրոն։ КамАЗ-ը եղել է կցորդիչով, եւ կցորդիչը պոկվել էր եւ այն բարձված էր եղել ցորենով, ցորենն էլ ամբողջովին թափվել էր։