«Թող գա ստորագրի թուղթը, գնա». Բագրատաշենում բողոքի ակցիա է

Տավուշի մարզի Այրում համայնքի Բագրատաշեն բնակավայրում բողոքի ակցիա է տեղի ունենում: Բնակիչները պահանջում են Բագրատաշենի վարչական ղեկավարի՝ ՀՀԿ-ական Արկադի Մակյանի հրաժարականը:

Ակցիայի մասնակիցները փակել են համայնքապետարանի մուտքը և թույլ չեն տալիս Մակյանին ներս մտնել: Ավելին՝ հրաժարականը պահանջող բնակիչները պատրաստել են «հրաժարականի թուղթ» և «ստիպում են» այն լրացնել:

Բնակիչներն ունեն հստակ պահանջներ, այն է՝ համայնքի փողոցների ասֆալտապատում, խմելու ջուր,  լուսավորում, մաքրություն, ինչը, ըստ նրանց, բացակայում է և միայն առկա է այնտեղ, ուր բնակվում է վարչական ղեկավար Մակյանը:

Նրանց խոսքով՝ ամենամեծ բյուջե ունեցող համայնքում չեն կարող նման խնդիրներ  լինել. «Մենք նրա հրաժարականն ենք պահանջում, թող գա ստորագրի թուղթը, գնա»:

Այրում համայնքի ղեկավար Արայիկ Պարանյանի և հավաքվածների՝ քիչ առաջ տեղի ունեցած  բանակցություններից հետո  ցույցը դադարեցվեց պայմանով, որ վաղը ժամը 2-ին կհանդիպեն և խնդիրը կքննարկեն:

Պարանյանը ԼՈՒՐԵՐ.com-ի հետ զրույցում նշեց, որ այս ամենն ընդամենը 20 հոգու պահանջ է, իսկ ջրի խնդիրը գրեթե լուծված է.«Մենք նրանց բացատրում ենք, որ խմելու ջրի հաշվիչները տեղադրվել են կամ տեղադրվում են և շուտով այդ հարցն էլ կկարգավորվի»:

Համայնքապետը շեշտեց, որ ընդամենը 2 փողոց կա չլուսավորված, որոնցից մեկն էլ, ըստ նրա՝ ցույցը կազմակերպողինն է՝ Մհեր Բաղդասարյանինը. «Նա է ուզում դառնալ Բագրատաշենի վարչական ղեկավար, դրա համար էլ ցույցեր է հրահրում: Ես ներկայիս ղեկավար Մակյանին չեմ պաշտպանում, թերություններ ունի, իհարկե, բայց համայնքը մեծ բյուջե ունի ու հնարավորինս լավ ենք նայում»:

Պարանյանը հավելեց նաև, որ սա հանրային պահանջ չէ ու խնդրին վաղը խելամիտ լուծում կտրվի:

Արմինե ՄԻՔԱՅԵԼՅԱՆ