Հանրային հնչեղություն ստացած գործով հանրությունը պետք է տեղեկացված լինի․ Ռուբեն Մելիքյան

«Ես ծանոթ չեմ գործին և այսօր այստեղ եմ գտնվում՝ ծանոթանալու Աղաջանովների հետ»,- այս մասին լրագրողների հետ զրույցում ասաց Արցախի նախկին ՄԻՊ Ռուբեն Մելիքյանը։ 

Նա նշեց, որ իր աջակցությունն է հայտնել սպանվածի ընտանիքին՝ առաջարկելով ներման դեպքում իրավաբանական օգնություն ցուցաբերել նրանց․ «Այստեղ կա օրենսդրության և դրա ընկալման հետ խնդիր։ Մենք ունենք իրավիճակ, երբ ներման պրոցեսում տուժողների իրավունքները ապահովված չեն, մարդիկ չեն տեղեկացնում, նրանց դիրքորոշումը որևէ մեկը չի հարցնում, իսկ մենք գործ ունենք ծանրագույն հանցագրոծության հետ։ Սա պետք է առիթ և խթան լինի, որպեսզի պարտադիր փոփոխություններ անենք մեր օրենսդրության մեջ և հավասարակշռված ձևով հաշվի առնվեն նաև առանձնապես ծանր հանցագործությունների տուժողների շահերը հատկապես այս դեպքում, երբ տարիներ շարունակ մեզ մատուցվել է միակողմանի տեղեկատվություն, ինչն արվել է դատապարտյալի մերձավոր ազգականի կողմից և չգիտես ինչ ժամանակահատվածի մասին է խոսքը։ Կարծում եմ՝ սա լրագրողական հանրության կողմից շատ լուրջ քննարկման առարկա պետք է դառնա, պետք է հասկանանք, որոնք են էթիկայի կանոնները, որքանո՞վ է սա թույլատրելի։ Եթե խոսքը լրագրողի մասին չլիներ, այլ լիներ պետական պաշտոնյայի մասին՝ մենք ունենք բացարկման ինստիտուտներ, հազար ու մի այլ ինստիտուտ»,- նշեց Ռուբեն Մելիքյանը՝ ընդգծելով՝ ի՞նչ անել, երբ արդեն իսկ ունենք ուղորդված հանրային կարծիք այս հարցի շուրջ։

Մելիքյանի խոսքով՝ այսպիսի հանրային հնչեղություն ստացած գործով հանրությունը պետք է տեղեկացված լինի, իհերկե՝ ոչ ամբողջությամբ․ «Բնականաբար, ոչ ոք իրավաչափ չի համարում, որ ներման հանձնաժողովի յուրաքանչյուր անդամի հայտնած դիրքորոշումը հրապարակվի, քվեարկության արդյունքները հրապարակվի։ Բայց՝ ինչպես է ներման խնդրագրում անձը ներկայացնում իր վերաբերմունքը իր կատարած հանցագործությունում, ընդունում է, թե ոչ՝ այս բոլոր հարցերը պետք է դառնան հանրության սեփականություն։ Հանրությունն այսօր բացարձակ տեղեկատվություն չի ստանում պետական մարմիններից՝ այն պատրվակով, որ այստեղ կան դատապարտյալի շահեր, հավանաբար, անհատական տվյալներով, բայց սա հավասարակշռված իրավական պաշտպանություն համարվել չի կարող»,- ասաց Մելիքյանը։

Ավելի վաղ տեղեկացրել ենք, որ այսօր Կառավարության շենքի դիմաց բողոքի ակցիա են անցկացնում 23 տարի առաջ դաժանաբար սպանված Իոսիֆ Աղաջանովի հարազատները, աջակիցներն ու բժիշկներ։

Սոնա Հարությունյան