Լյովա Երանոսյանի գյուղում կրկին ծեծկռտուք է եղել․ ոստիկանները դեպքի վայրում են

Արմավիրի մարզի Ջրառատ համայնքում քիչ առաջ կրկին ծեծկռտուք է տեղի ունեցել. բնակիչների փոխանցմամբ` վիճաբանությունը եղել է Լյովա Երանոսյանի քրոջ` համայնքապետ որդու՝ Սամվել Գալստյանի համակիրների և ՏԻՄ ընտրություններում Գալստյանի հակառակորդ թեկնածու Հակոբ Մելքոնյանի և վերջինիս համակիրների միջև։ Գործի են դրվել նաև մետաղյա ձողեր։

Համայնքում այս պահին լարված մթնոլորտ է տիրում, բնակիչները նշում են, որ Հակոբ Մելքոնյանը վնասվածքներ է ստացել, իսկ նրա եղբայրը, որը 2017թ. նպանատիպ միջադեպի ժամանակ կոտրել էր թևը, այս պահին չի գտնվում։

Համայնքապետ Սամվել Գալստյանը ԼՈՒՐԵՐ․com-ի հետ զրույցում նշեց, որ ինքը ևս լսել է գյուղում տեղի ունեցած ծեծկռտուքի մասին, սակայն, մանրամասներից տեղյակ չէ։

«Այս պահին ոստիկանությունը ժամանել է և միասին զրուցում ենք, փորձում ենք հասկանալ, թե ինչպե՞ս է եղել և ովքե՞ր են մասնակիցները։ Ես, ճիշտն ասած, տեղյակ չեմ` ինչ է եղել»,- մանրամասնեց համայնքապետը։

Համայնքի բնակիչներից մեկը նշեց, որ երեկ ևս համայնքում լարված մթնոլորտ է եղել․ «Էդ գյուղապետը ոչ մեկիս հանգիստ չի թողնում, ամեն օր նույն կռիվն ա գյուղում, հոգնել ենք արդեն, չի թողնում ապրենք»։

Նշենք, որ տևական ժամանակ է՝ Ջրառատ համայնքում կրքերը չեն հանդարտվում, բնակիչները պահանջում են ՀՀԿ-ական համայնքապետ Սամվել Գալստյանի հրաժարականը։ Վերջիններս նաև ստորագրահավաք են կազմակերպել, որին մասնակցել է Ջրառատի 750-ից ավել բնակիչ։

Նշենք նաև, որ ՀՀ ոստիկանության ներքին զորքերի նախկին հրամանատար Լյովա Երանոսյանը Ջրառատ համայնքի բնակիչ է։

Հիշեցնենք, որ նույն խմբի միջև ծեծկռտուք էր տեղի ունեցել նաև 2017թ, որն ավարտվել էր կրակոցով և տուժածների շարքում կրկին Մելքոնյանների ընտանիքն էր։

Արմինե ՄԻՔԱՅԵԼՅԱՆ