Գոռ Երիցյանի մենամարտի օրը հայտնի է

Փետրվարի 9-ին Սոչիում կայանալիք բռնցքամարտի երեկոյի ընթացքում ռինգ դուրս կգան նաեւ հայ պրոֆեսիոնալ բռնցքամարտիկներ Վահե Սարուխանյանն ու Գոռ Երիցյանը: Այս մասին տեղեկացնում է Punch Boxing Armenia-ն:

WBO վարկածով աշխարհի երիտասարդների չեմպիոն Երիցյանի մրցակցի անունը դեռեւս հաստատված չէ: Վահե Սարուխանյանն, ով պրոֆեսինալ ռինգում տոնել է 19 հաղթանակ, իր առաջին մենամարտը կանցկացնի ՌԴ նախագահ Վլադիմիր Պուտինի անվան գավաթի խաղարկությունում, որին կմասնակցեն թեթեւ քաշային կարգում Ռուսաստանի ուժեղագույն 8 բռնցքամարտիկները: Մրցաշարի առաջին մենամարտում Սարուխանյանի մրցակիցը կլինի Պավել Մալիկովը: ՌԴ նախագահի անվան գավաթի խաղարկությունում բացարձակ հաղթող կճանաչվի այն բռնցքամարտիկը, ով հաղթանակ կտոնի 3 մենամարտերում: Նշենք, որ Վահե Սարուխանյանն այս օրերին գտնվում է Երևանում եւ առաջիկա մենամարտին նախապատրաստվում է մարզիչ Դավիթ Թորոսյանի գլխավորությամբ: