ԵՊՀ-ն փոխվում է. «Ռեստարտը» բավարարվա՞ծ է

Ինչպես արդեն տեղեկացրել ենք, այսօր ԵՊՀ հոգաբարձուների խորհրդի 9-րդ նիստում նախագահ ընտրվեց Գևորգ Մուրադյանը, որը մինչև 2018 թ. ապրիլ ամիսը եղել է ՀՀ նախկին վարչապետ Կարեն Կարապետյանի խորհրդականը:

Նշենք, որ ԿԳ նախարար Արայիկ Հարությունյանն իր ֆեյսբուքյան էջում անդրադարձել էր ԵՊՀ-ում տեղի ունեցած նիստին և իր ֆեյսբուքյան էջում գրել. «Երևանի պետական համալսարանի հոգաբարձուների խորհրդի առաջին նիստը, երբ ԵՊՀ գլխավոր մասնաշենքը շրջափակված չէ և ուսանողների ու դասախոսների ազատ տեղաշարժը սահմանափակված չէ»:

ԼՈՒՐԵՐ.com-ի թղթակիցն այսօր ԵՊՀ-ում տեղի ունեցած նիստի, քննարկումների և նիստից ստացած տպավորությունների մասին զրուցեց «ԵՊՀ Ռեստարտ» նախաձեռնության անդամ Դավիթ Պետրոսյանի հետ:

 «Մեկ նիստով բարդ է կարծիք կազմել, որովհետև այս նիստը մարդկանց ծանոթանալու, լսելու, հասկանալու համար էր: Եթե հաջորդ նիստը լինի մեկ տարի հետո, ինչպես նախկինում էր, պարզ է, որ կլինի անարդյունավետ», - նշեց Դավիթ Պետրոսյանը: Վերջինիս կարծիքով՝ խորհրդի նոր կազմը տարբերվում հին կազմից, քանի որ նոր կազմում ավելի շատ են կրթական ոլորտի հետ առնչություն ունեցող մարդիկ:

«Մի խնդիր կար՝ ԲՈՒՀ-երի ինքնակառավարման, ինքնիշխանության հետ կապված հարցադրումներ շարունակվում են լինել, սակայն Բրաձրագույն կրթության օրենքով, երբ  կառավարման խորհուրդների հարցը քննարկվի մենք մեր առաջարկությունը կներկայացնենք: Առաջին նիստի ժամանակ այդքան մեծ ծավալով աշխատանք հնարավոր չէր իրականացնել»,-ասաց Պետրոսյանը:

Հարցին՝ ինչպե՞ս են վերաբերվում նախկին վարչապետ Կարեն Կարապետյանի խորհրդականի՝ Գևորգ Մուրադյանի՝ ԵՊՀ հոգաբարձուների խորհրդի նախագահ դառնալուն, Պետրոսյանը նկատեց, որ Մուրադյանի՝ նախկին կառավարության աշխատող լինելը դեռ բավար հիմք չէ թերահավատորեն մոտենալու համար:

«Ես միայն կարծիք հայտնելիս հաշվի կառնեմ իր կոմպետենցիան, անցած ճանապարհը, աշխատանքի ցանկությունը: Մարդիկ կարող են աշխատած լինել նախկին իշխանությունների ժամանակ, կարող է լինեն ՀՀԿ-ական, բայց եթե այժմ ցանկանում են ներգրավվել աշխատանքի մեջ, միայն դա հաշվի առնելով՝ չի կարելի ասել՝ դեմ ենք»,- ասաց Դավիթ Պետրոսյանը և հավելեց, որ առաջին նիստը, որպես ուսանող, իրենց համար հետաքրքիր է եղել, քանի որ, ինչպես ինքն է ասում՝ «Մուրադյանը կոնկրետ հարցեր է բարձրաձայնել, նիստը պահում էր օրակարգի մեջ, ընդհանուր տիրապետում էր իրավիճակին և պատրաստակամ է հանդիպել «ԵՊՀ Ռեստարտ» նախաձեռնության անդամների հետ»:

Նշենք, որ Դավիթ Պետրոսյանն այժմ չի հանդիսանում ԵՊՀ ուսանող, սակայն մեզ հետ զրույցում նա նշեց, որ համալսարանից դուրս է եկել իր դիմումի համաձայն, քանի որ պետք է իր մագիստրոսական կրթությունը  շարունակեր երկրի սահմաններից դուրս: 

Արմինե Արմենակյան