ՊԵԿ նախագահի հայտարարագիրը

ՊԵԿ նախագահ Դավիթ Անանյանը կատարել է խոստումը: Ինչպես խոստացել էր Կառավարության հունվարի 24-ի նիստից հետո լրագրողների հետ ունեցած ճեպազրույցում, Բարձրաստիճան պաշտոնատար անձանց էթիկայի հանձնաժողով է ներկայացրել 2018 թվականի հայտարարագիրը: Այս մասին նա տեղեկացրել է իր ֆեյսբուքի էջի միջոցով. «Կարծում եմ, որ հայտարարագրում ներկայացված տեղեկատվությունը ավելի քան բավարար է` մեր լրագրող-գործընկերների և, ընդհանրապես, հանրության տեղեկատվական կարիքները բավարարելու համար»,- գրել է նա։

Ստորև ներկայացնում ենք ՊԵԿ նախագահի տարեկան հայտարարագիրը: Նկատենք, որ այստեղ որևէ անշարժ կամ շարժական գույք հայտարարագրված չէ։

Ըստ հայտարարագրի՝ Անանյանը երկու աղբյուրից ստացել է աշխատավարձ կամ դրան հավասարեցված այլ վճարումներ՝ 4 մլն 808 հազար 668 դրամի և 18 մլն 482 հազար 639 դրամի չափով։ Բացի այդ, ստացել է շահաբաժին՝ մոտ 14.9 մլն դրամ, այլ եկամուտներ՝ 1,494 եվրո և 6,750 եվրո, 2 գույքի օտարումից՝ 2.5 մլն և 2.4 մլն դրամի չափով։

Բանկային հաշվեհամարներում տարվա ընթացքում կուտակումներն աճել են: Եթե այն տարեսկզբին 1 մլն 650 հազար դրամ է եղել, ապա տարեվերջին դարձել է 2.1 մլն դրամ, 2500 դոլարը՝ 7000 դոլար, 1500 եվրոն՝ 2000 եվրո։

2018-ին ՊԵԿ նախագահը հանձնել է 3 մլն 393 հազար 200 դրամ փոխառություն, որից վերադարձվել է 2մլն 848 հազար դրամը։

Հիշեցնենք՝ Դավիթ Անանյանը հայտարարագիրը ներկայացրել է աստղաբաշխական պարգևատրումների աղմուկից հետո: