ՊԵԿ-ում դիտավորյալ կրճատումներ են արվում

ՀՀ Պետական եկամուտների նախագահ Դավիթ Անանյանը 2018թ. պետական բյուջեի հարկային եկամուտների կատարման հաշվետվությունը ներկայացնելիս հաստատեց այն տեղեկությունները, թե ՊԵԿ-ի շուրջ 200 աշխատակից ազատվել են աշխատանքից: 

Անանյանի խոսքով՝ յուրաքանչյուր աշխատակցի վերաբերյալ կատարվել է առանձին, կոլեգիալ որոշում։ Ավելի քան երկու ամսվա ընթացքում գնահատվել են ՊԵԿ 580 աշխատակիցի կարողությունները: «Ցավոք, շատ դեպքերում ընտրությունը կատարել ենք լավի և լավագույնի միջև»,-ասել է Անանյանը։ 

ՊԵԿ աշխատակիցներից ԼՈՒՐԵՐ.com-ին փոխանցեցին, որ 200 հեռացված աշխատակիցներից բացի առաջիկայում կրճատումներ էլ են սպասվում, ինչը արվում է «օրինական» ճանապարհով: 

Պարզվում է՝ ՊԵԿ-ը խորամանկ քայլի է դիմել հնաբնակներից և փորձառուներից ազատվելու և սեփական կադրերին տեղավորելու համար: Դեկտեմբերին ՊԵԿ-ը քննություն է կազմակերպել թե՛ գրավոր և թե՛ բանավոր հիմունքնեով՝ մինչև 7-8 տարվա աշխատակիցների գիտելիքներն ստուգելու համար, և ինչ է ստացվել՝ բանավոր քննության ժամանակ տրվող 4 հարցերից գոնե երկուսին չպատասխանած մտերիմները ստացել են քննությունը, իսկ առնվազն երեքին պատասխանած հնաբնակներն ու փորձառուները քննությունից հետո պարզել են, որ կտրվել են:

Գրավոր տարբերակով հանձնվող քննությունը ևս անցել է ընդգծված խտրականությամբ, քանի որ մարդիկ, որոնք ի սկզբանե պետք է ծառայությունը շարունակեն ՊԵԿ-ում, ստացել են հարցաշարի պատասխանները և արտագրել դրանք. «Պատկերացնու՞մ եք՝ եթե նախկինում 80 միավոր էր սահմանվում քննության արդյունքները, այս տարի շեմը բարձրացրել էին 90-ի և պլյուս դրան՝ իրենց մտերիմներին հարցերի պատասխաններն էին բաժանել, մենք սկզբունքորեն դեմ եղանք այդ միջավայրում աշխատելուն, և մեր սովորական 80 բալը հավաքած դուրս եկանք: Հիմա ու առաջիկայում ուշադիր եղեք՝ կտեսնեք, որ ընդունվածները կամ Անանյան են, կամ էլ իրա տեղակալի՝ Շուշանիկ Ներսիսյանի (Նակոլկա Շուշո) ազգանունով»,-մանրամասնեց ՊԵԿ աշխատակիցը: 

Հիշեցնենք, որ մեր նախորդ հրապարակմամբ անդրադարձել էինք նաև ՊԵԿ-ում գործող ցածր օղակի իրական պարգևավճարներին, որը եղել է 10.000 դրամի, 0.5 լիտրանոց օղու, կոնյակի և ձեռքի ափի չափով չրի տեսքով:

Արմինե ՄԻՔԱՅԵԼՅԱՆ