Դիանա Գասպարյանի արձագանքը՝ էջմիածնեցիների դժգոհությանը

Սիրելի՛ էջմիածնեցիներ, ես հասկանում եմ, որ ձեր դժգոհությունները տեղին են, իսկ պահանջները՝ իրավացի, բայց նաև ցանկացած քննադատություն պետք է լինի հիմնավորված, օբյեկտիվ և ողջամիտ: Մասնավորապես, հանդիպող այն մեղադրանքները, թե նախկինում գոնե փոսալցում էին կատարում, իսկ հիմա՝ ոչ, տեղին չեն, քանի որ տարվա այս եղանակին Էջմիածնում երբեք ասֆալի փոսալցումներ չեն արվել: Ստորև ներկայացնում եմ հստակ տվյալներ.

2016 թվականին Էջմիածնում թե՛ փոսալցման, թե՛ հիմնանորոգման աշխատանքները սկսվել են մայիսի 16-ից,

2017 թվականին փոսային ասֆալտապատումը մեկնարկել է ապրիլի 4-ից, իսկ հիմնանորոգման աշխատանքները՝ ապրիլի 17-ից,

2018 թվականին փոսային ասֆալտապատում իրականացվել է մարտի 15-ից, իսկ փողոցների հիմնանորոգում՝ ապրիլի 20-ից:

Ես հորդորում եմ հաշվի առնել, որ ճանապարհների այս վիճակը ոչ թե մեր թերացումների, այլ նախկինում արված անորակ աշխատանքների, ինչպես նաև բնական մաշվածության հետևանք է, հետևաբար մեզ ուղղված քննադատություններն անարդարացի են:

Միևնույն ժամանակ, տեղեկացնում եմ, որ մեր մարտավարությունը լինելու է հետևյալը. անել հետզհետե, քայլ առ քայլ, բայց անել կապիտալ և որակով, ինչը կծառայի երկար և չի պահանջի նոր ներդրումներ:

Այդ նպատակով, այս տարի մեր համայնքն օգտվելու է ՀՀ կառավարության կողմից իրականացվող սուբվենցիոն ծրագրից, որի պարագայում կատարվող հիմնանորոգման համար պետության կողմից տրամադրվում է 45% համաֆինանսավորում, իսկ 55%-ը ներդրվում է համայնքի միջոցներից:

Առաջիկայում ձեզ կներկայացվի և հանրային քննարկման կդրվի այն փողոցների ցանկը, որոնք ծրագրվում է հիմնանորոգել:

Հիմնանորոգումից առաջ քերված ասֆալտը կվերամշակվի և դարձյալ կգտագործվի ամբողջովին հողածածկ փողոցների ասֆալտապատման նպատակով,

Մինչ այդ, մոտ օրերս, որպես ժամանակավոր լուծում, կմեկնարկի խորը փոսերի փակման և լցոնման գործընթաց:

Հուսով եմ՝ գոնե այս պարզաբանումից հետո մեզ քննադատողները կփորձեն ավելի օբյեկտիվ գտնվել և մեզ անհարկի չմեղադրել քաղաքի բազմամյա խնդիրների համար:

Անողոք քննադատողներին շնորհակալ եմ, դուք մեզ մոտիվացնում եք՝ շարժվելու առաջ. բայց նաև ձեզ սրտանց ցանկանում եմ թեկուզ մեկ օրով հայտնվել ղեկավար պաշտոնում, բախվել այն հազարավոր խնդիրներին, որոնց մենք ենք բախվում, և առերեսվել միջոցների այն սղությանը, որին մենք ենք առերեսվում:

Ծառայում ենք ձեզ, բայց այդ բարդ գործում ունենք ձեր աջակցության և ողջախոհության կարիքը: Բարի օր եմ մաղթում բոլորիդ»: