Փակել են Էջմիածին-Մարգարա ճանապարհը․ պահանջում են մարզպետին (տեսանյութ, լուսանկար)

Արմավիրի մարզի Գրիբոյեդով համայնքի բնակիչները բողոքի ակցիա են կազմակերպել և 10 րոպեով փակել են Մարգարա խճուղի տանող ճանապարհը։ Բողոքի ակցիայի պատճառը համայնքի վատ ճանապարհներն են, որը բնակիչների տեղաշարժի համար խնդիր է դարձել։

«Գյուղի խաղաղ բնակիչներով որոշել ենք կազմակերպել բողոքի ցույց ոչ թե կառավարության դեմ կամ վարչապետի, այլ մեր ճանապարհների համար։ Գյուղում ճանապարհները ահավոր անանցանելի են։ Շտապօգնության մեքենան կանչի ժամանակ ուշացումներով է գալիս։ Էջմիածին քաղաքից ցանկացած տաքսիի վարորդի ասում ենք Գրիբոյեդով, ասում է՝ չեմ տանի, ու այդպես շատ խնդիրներ։ Փոշի կամ անձև լինելիս ընդհանրապես անանցանելի է դառում»,- ԼՈՒՐԵՐ.com-ի հետ զրույցում ասաց Գրիբոյեդով համայքնի բնակիչ Անդրանիկ Բայրամյանը։

Վերջինս նաև հայտնեց, որ այդ համայնքի միջով  շուրջ 7-8 համայնքների բնակիչներ գնում են Մեյմանդարի շուկա։ Եվ բողոքող բնակիչների հիմնական պահանջն է համայնքի 100 ամյակի կապակցությամբ կառավարության կողմից ստանան աջակցություն ճանպարահները ասֆալտապատելու։

«Ասում են 50 տոկոս հարկերը պետք է համայնքը վճարի, 50 տոկոս կառավարությունը տա, որ ասֆալտապատում անեն։ Բայց եթե բնակիչները այդքան երկար տարի չեն կարողացել հարկերը վճարել հիմա ոնց են 50 տոկոս հավաքելու»։

Անդրանիկ Բայրամյանը նաև նկատեց, որ ի սկզբանե չեն ցանկացել Մարգարայի խճուղին փակել և բնակիչներով համայնքում էին հավաքվել․ «Ցանկանում էինք մարզպետը գար, տեղում ծանոթանար իրավիճակին։ Սակայն մեզ ոստիկանությունից զանգեցի և ասացին, որ բնակիչներից 20 հոգի գնա մարզպետարան։ 2 ժամ սպասելուց հետո, որ մարզպետը չեկավ որոշվեց Մարգարայի խճուղին փակվի՝ բողոքի ակցիան ավելի հասանելի դարձնելու համար կառավարությանը, սակայն ոստիկանության հետ բանակցելուց հետո ճանապարհները բացել և չենք խոչընդոտում երթևեկությանը։ Այժմ ժամանակ ենք տվել, որ մարզպետը գա»,- նկատեց համայնքի բնակիչը։

Արմինե ԱՐՄԵՆԱԿՅԱՆ