Ադրբեջանն ինչ-որ ժամանակ է տվել Փաշինյանին

Ադրբեջանի զինված ուժերը մարտի 11-ից 15-ը լայնածավալ զորավարժություններ են անցկացնելու, որին ներգրավվելու է մինչև 10 հազար զինծառայող, 500 միավոր տանկ, զրահատեխնիկա․․․ 

Հայաստանի Պաշտպանության նախարարության մամուլի խոսնակ Արծրուն Հովհաննիսյանը Ֆեյսբուքում անդրադարձել է զորավարժություններին ու հայտարարել, որ Ադրբեջանը խախտել է միջազգային պայմանագիրը՝ չտեղեկացնելով վարժանքների մասին․ «Ենթադրվում է, որ այս զորավարժությունը կազմակերպվել է Փաշինյան-Ալիև հանդիպման համատեքստում և ճնշման փորձ է, ի պատասխան այն հայտարարությունների, որ ազատագրված տարածքներից Հայաստանը ոչ մի տարածք չի զիջելու Ադրբեջանին»,-գրել է Հովհաննիսյանը:

ԼՈՒՐԵՐ․com-ի թղթակցի հետ զրույցում Razm.info մասնագիտացված կայքի համակարգող, ռազմական հարցերով փորձագետ Կարեն Վրթանեսյանը նկատեց, որ Ադրբեջանի կողմից լայնամասշտաբ զորավարժություններն անցկացնելն արտառոց երևույթ չէ և նմանատիպ զորավարժություններ նախկինում էլ են եղել․ «Նախկինում էլ Ադրբեջանը չի զգուշացրել, ինչը պարտավոր է անել՝ ըստ միջազգային պարտավորություննների։ Սա եզակի երևույթ չէ։ Այստեղ խնդիրն այլ է, որ անկախ նրանից, թե մենք դա ընկալում ենք ուժի ցուցադրություն, թե ինչ, մեր թշնամին պատրաստվում է ինչ-որ ռազմական գործողությունների»,- ասաց Փորձագետը։

 

Անդրադառնալով ՊՆ-ի հայտարարությանը, նա նշեց, որ նմանատիպ հայտարարությունները ՊՆ-ի միանձնյա որոշումով չեն կայացվում և ինքը հակված է կարծելու, որ դա եղել է կառավարության պատվերը։ Ինչ վերաբերում է Ադրբեջանի այս զորվարժությունները Փաշինյան-Ալիև հանդիպման հետ կապելուն, փորձագետը նշում է․ «Մինչ այս պահը կոնկրետ բան չի ասվել Փաշինյան-Ալիև հանդիպման մասին, որ ադրբեջանական կողմը հասցներ պատրաստվել նման մեծ զորավարժության և դրանով փորձեր ինչ-որ մեսսիջ փոխանցել։ Ես սխալ եմ համարում այն դիրքորոշումը, որ մենք Ադրբեջանի ցանկացած գործողություն փորձենք բացատրել ինչ-որ մեսիջներով միայն։ Ըստ էության, Ադրբեջանը պատրաստվում է ռազմական գործողությունների։ Ապրիլյան դեպքերից հետո կասկածելը, որ Ադրբեջանը կարող է դիմել լայնամասշտաբ արկածախնդրությունների՝ հիմարություն է։ Մենք պետք է հասկանանք, որ Ադրբեջանը հենց հնարավորություն ունենա ռազմական ճանապարհով ինչ-որ խնդիր լուծել, փորձելու է դա անել»,- ասաց Վրթանեսյանը։

 

Վերջինս նաև կարծիք հայտնեց, որ զորավարժությունները Փաշինյան- Ալիև հանդիպման հետ կապելով, փորձում են ներքին խնդիրներից ուշադրություն շեղել՝ հաշվի առնելով վերջին օրերին մեկը մյուսին հաջորդող սկանդալային դեպքերը՝ կապված առաջին անձերի հետ․ «Ցանկացած դեպքում, շատ սխալ է փորձել հակառակորդի  գործողությունները, ռազմական պատրաստությունը և այլն՝ ներկայացնել զուտ որպես միայն ու միայն ցուցադրական տեսանկյունից։ Ցուցադրական տարր կա, բայց կան նաև ռեալ վտանգներ»,-ասաց ռազմական փորձագետը։

 

Վրթանեսյանը Փաշինյան-Ալիև պայմանավորվածությունները խնդրահարույց է համարում, մասնավորապես, խոսքը Դուշանբեի վերելակում բանավոր պայմանավորվածությանն է վերաբերվում․ «Վերելակային պայմանավորվածությունը, որը ներկայացվեց որպես շատ լավ երևույթ, իրականում բավականին խնդրահարույց պահեր ունի, որովհետև, օրինակ, ադրբեջանական կողմը լայնածավալ ինժեներաշինարարական աշխատանքներ է արել ամբողջ առաջնագծի երկայնքով, որոնք նախկինում ի վիճակի չէր լինի անել, որովհետև մենք կրակով կճնշեինք։ Հիմա, եթե նորից սրվի իրավիճակը, իրենք ավելի հարմար պայմաններից են վարելու մարտական գործողությունները։ Խաղաղությունը լավ բառ է, գեղեցիկ բառ է, նախընտրական փուլում կարելի է դրա վրա դիվիդենտներ շահել, բայց դրա հետևանքները հետո քանի՞ կյանք են խլելու»։

 

Ամփոփելով, փորձագետը նկատեց, որ  ազատագրված տարածքներից Հայաստանը ոչ մի տարածք չի զիջելու Ադրբեջանին հայտարարությունը կարող էր լինել պատրվակ՝ նման մասշտաբի զորավարժություններ անցկացնելու համար: Ի դեպ, Նիկոլ Փաշինյանի պաշտոնավարման օրոք սա առաջինն է․ «Սակայն պատճառներից կարող էր լինել այն, որ դեռ ամիսներ առաջ Ադրբեջանի գլխավոր շտաբի պետը այսպիսի ուղերձ էր հղել, թե հայերին չպետք է թվա, որ կարող են ձգձգելով, խուսափել տարածքներ զիջելու վերաբերյալ բանակցություններից։ Սա կարելի է դիտարկել այդ կոնտեքստում։ Ադրբեջանն ինչ-որ ժամանակ տվել է Փաշինյանին, որպեսզի նա ներսում կարողանա իր դիրքերն ամրապնդել։ Հիմա Ադրբեջանը պահանջում է ինչ-որ զիջումների, քայլերի գնալ»։