Մինսկի խմբի հայտարարության 70 տոկոսը մեսիջ էր Ադրբեջանին

ԵԱՀԿ Մինսկի խմբի համանախագահները Նիկոլ  Փաշինյան- Իլհամ Ալիև հանդիպմանն ընդառաջ հայտարարություն են տարածել, որը դարձել է հանրային բուռն քննարկումների առարկա, մասնավորապես սոցցանցային հարթակում։ Համանախագահները կոչ են անում երկու կողմերին «ձեռնպահ մնալ հայտարարություններից և գործողություններից, որոնք ենթադրում են ներկա իրավիճակի լուրջ փոփոխություններ, կանխորոշում են կամ հետագա բանակցությունների համար նախապայմաններ են ստեղծում․․․»։

Իսկ ընդհանուր հայտարարության մասին քննարկումները տարբեր են՝ շատերի համար սա ՀՀ դիվանագիտության պարտությունն էր, շատերի համար ի շահ Ադրբեջանի՝ միակողմ հայտարարություն, իսկ իշխանական թևի արձագանքը, մասնավորապես, վարչապետի մամուլի խոսնակը հայտարարությունը համարել է հերթական, որտեղ արտառոց ոչինչ չկա։

ԼՈՒՐԵՐ․com-ի թղթակիցը թեմայի շրջանակներում զրուցեց ԱԺ «Իմ քայլի» պատգամավոր, արտաքին հարաբերությունների հանձնաժողովի փոխնախագահ Հովհաննես Իգիթյանի հետ, որն այլ կերպ մեկնաբանեց հայտարարությունը․

«Եվրանախագահների հայտարարությունն ուղղված է բոլոր կողմերին։ Եվրանախագահաները գոհունակություն են հայտնում, որ վերջապես կարող է կայանալ նախագահների հանդիպումը։ Ընդ որում, շատ կարևոր է այստեղ ամեն մի խոսքը, որը դիվանագնետներն են գրել․ խոսքը գնում է առաջին ուղիղ կոնտակտի մասին, ո՛չ բանակցություններ, ո′չ օֆիցիալ հանդիպում նշված չէ։ Նշվում է հատուկ առաջին ուղիղ կոնտակտի մասին, որն արվում է համանախագահների մասնակցությամբ։ Բանակցությունների մասին ընդհանրապես խոսք չկա, այլ ամեն տեղ նշվում է կոնտակտ հանդիպում։ Եվ, ըստ էության, այս հայտարարությունը կարելի է ընկալել Վիեննայի և Սանկտ Պետերբուրգի հայտարությունների տեսքով, այսինքն՝  խոսքը գնում է այնպիսի մթնոլորտ ստեղծելուն, որ հետագայում հնարավոր լինի կողմերին բերել սեղանի շուրջ և բանակցել»,- ասաց Իգիթյանը։

Վերջինս անդրադառնալով խոսակցություններին, թե ԵԱՀԿ Մինսկի խմբի համանախագահները մերժում են Նիկոլ Փաշինյանի այս մոտեցումը, որ Արցախը պետք է մասնակցի բանակցություններին, նշեց, որ նշված կոնտակտի ժամանակ չեն նախատեսվում բանակցություններ, հետևաբար խոսելը մերժման մասին ավելորդ է․

«Համանախագահները ողջունում են ուղիղ երկխոսությունը Բաքվի և Երևանի միջև, որը կարող  է ստեղծել վստահության մթնոլորտ։ Դա մեզ պետք է, որ հետագայում սկսվեն բանակցությունները։ Դիվանագիտորեն անուղղակի նշված է, որ համանախագահները կշարունակեն քննարկել համապատասխան հարցեր բոլոր շահագրգիռ կողմերի հետ, որոնք ներգրավված են կոնֆլիկտին։ Այստեղ միանշանակ խոսքը Արցախի մասին է։ Եվ ևս շատ կարևոր հանգամանք, որն անհրաժեշտ է բանակցային փուլը  սկսելու համար․ նշվում է Հելսինկյան եզրափակիչ ակտի հիմնական սկզբունքները և հատուկ նշված է, որ խոսքը գնում է խաղաղ ձևով կոնֆլիկտի լուծման սկզբունքը, տարածքային ամբողջականության և ժողովուրդների ինքնորոշման սկզբունքը։ Համանախագահները ընդգծում են, որ որևէ սկզբունք չպետք է գերակայություն ունենա այս սկզբունքի հանդեպ։ Սա այն պատասխանն է Ադրբեջանին, որն անընդհատ նշում է տարածքային ամբողջականության սկզբունքը հիմնականն է, և դա օգտագործելով՝ նրանք անընդհատ բանակցում են այլ երկրների հետ, որոնք ունեն համանման խնդիրներ»,- ընդգծեց ԱԺ պատգամավորը։

Ինչ վերաբերում է վարչապետ Փաշինյանի հայտարությունը, որ նա չի ներկայացնում Արցախը կամ իրեն ընտրել են ՀՀ քաղաքացիները, այդ սկզբունքը չի հերքվում և չի կարող հերքվել ո′չ Ադրբեջանի կողմից, ո′չ էլ Մինսկի խմբի համանախագահների։

Թեպետ Ադրբեջանն արձագանքել էր, որ ողջունում է ԵԱՀԿ Մինսկի խմբի համանախագահների տարածած հայտարարությունը, և, ըստ Ադրբեջանի ԱԳՆ տարածած հաղորդագրության, դա ազդանշան էր Հայաստանի համար, սակայն Իգիթյանի կարծիքով՝  ամբողջ հայտարարության 70 տոկոսը մեսիջ էր Ադրբեջանին․ «Նշված է, որ ռազմական հռետորիկան անընդունելի է, անընդունելի է շանտաժը, ռազմական ձևով որևէ  կնֆլիկտի ցանկությունը կամ հայտարարությունները, եթե նայենք, այս բոլոր անընդունելիները, ապա դրանք ուղղված են Ադրբեջանին»։

Արմինե ԱՐՄԵՆԱԿՅԱՆ