Նկարն արված է աղմուկ բարձրացնելու համար․ ՍԱՊԾ արձագանքը

Այսօր ֆեյսբուք սոցիալական ցանցում տարածվել է լուսանկար, որտեղ երևում է ինչպես են մեքենայի բեռնախցում հակահիգենիկ վիճակում գազի բալոնի վրա շարված հաց տեղափոխում։ Սա համացանցի օգտատերերի շրջանում բուռն քննարկումների և քննադատությունների ալիք էր բարձրացրել։ ԼՈՒՐԵՐ․com-ի թղթակիցը թեմայի վերաբերյալ զրուցեց  ՍԱՊԾ տեղեկատվության և հասարակայնության հետ կապերի բաժնի պետ Անուշ Հարությունյանի հետ, որը նշեց, ամենայն հավանականությամբ, նկարն արված է Հայաստանում, սակայն այդ նկարից որևէ հավելյալ տեղեկություն չի փոխանցում, թե ինչ մեքենա է կամ որտեղ է արված լուսանկարը․

«Ակնհայտորեն երևում է, որ նկարն արված է այնպես, որ ոչինչ չերևա, առաջին հերթին չի երևում պետհամարանիշները և հնարավոր չի հասկանալ, թե մեքենան որտեղ է։ Այս դեպքում այն պրակտիկորեն գտնելն անհնար է՝ չի երևում որտեղ է նկարած, տարածքը հնարավոր չէ ճանաչել։ Հասկանալի չէ նոր են բերել վաճառքի, թե հին հաց է, գուցե տանում են, օրինակ, խոզերին տալու նպատակով։ Իրականում, ակնհայտ է, որ նկարն արված է աղմուկ բարձրացնելու համար։ Այնպիսի տպավորություն է, որ վարորդը կանգնել է իր մեքենայի ետևում՝ նկարելով այնպես, որ չերևա, թե մեքենան որտեղ է, կամ մեքենայի պետհամարանիշները չերևան»,- ասաց Հարությունյանը։

Նա նկատեց, որ ոլորտում տոտալ վերահսկողություն է և հաց տեղափոխող մեքենաները ստանում են սանիտարական անձնագիր․ «Ես կարող եմ ասել, որ սննդի այն օպերատորները, որոնք մեզ մոտ գրանցված են, բոլորն ունեն սանիտարական անձնագիր, որը թարմացվում է տարին մեկ անգամ։ Մեքենան նորից ստուգում է անցնում և պայմաններին համապատասխանելու դեպքում նորից մեկ տարի ժամկետով ստանում են»,- ասաց Հարությունյանը։

Սակայն նման վերահսկողության պայմաններում էլ վերջինս չբացառեց նմանատիպ դեպքերը․

«100 տոկոսով բացառել, որ հնարավոր չէ այդպիսի դեպք լինի, ինձ թույլ չեմ տա ասել, որովհետև դեռևս կան մարդիկ, որ կարող են հացը լցնել թափքի մեջ կամ նստատեղերի վրա։ Մենք այդպիսի նկարներ ստացել ենք՝ համարանիշով և այլ մանրամասներով։ Գնացել, կասեցրել ենք։ 100 տոկոսանոց արդյունք այս պահին չունենք և առաջիկայում չենք ունենա, քանի որ տնտեսվարողը պատասխանատվության այդ զգացումը չունի, որ այդ ձևով չի կարելի հաց տեղափոխել»,- ամփոփելով ասաց Անուշ Հարությունյանը։

Արմինե ԱՐՄԵՆԱԿՅԱՆ