Ադրբեջանը կստանա քարտ-բլանշ նոր պատերազմական գործողություն վերսկսելու համար

ՀՀ վարչապետ Նիկոլ Փաշինյանի և Արցախի Հանրապետության նախագահ Բակո Սահակյանի համանախագահությամբ Ստեփանակերտում այսօր կայացել է Հայաստանի և Արցախի Անվտանգության խորհուրդների համատեղ նիստ: Թե′ նիստի արտահերթ հրավիրվելը, և թե′ դրա ժամանակ հնչած ելույթները փաստում են, որ այն կապված է Մինսկի համանախագահների հայտնի հայտարարության հետ:

 «Քանի որ կար համանախագահների հայտարարությունը,  որ ֆորմատի փոփոխությունն անթույլատրելի էր, և սպասվում է հանդիպում Ալիևի հետ, իսկ բանակցությունները վարելու է Փաշինյանը, տրամաբանական է, որ դրանից առաջ նա ճշգրտելու էր որոշակի հարցեր Արցախի վերնախավի հետ: Սակայն նրա ելույթը շատ պոպուլիստական էր»,- այսպիսի տեսակետ ԼՈՒՐԵՐ.com-ի թղթակցի հետ զրույցում նման տեսակետ հայտնեց  քաղաքագետ Երվանդ Բոզոյանը:

Բոզոյանն անդրադառնալով Նիկոլ Փաշինյանի ելույթի այն հատվածին, որտեղ, մասնավորապես, նշվում է, որ Հայաստանն ու Արցախը տեսնում են Մադրիդյան սկզբունքների և Հելսինկյան եզրափակիչ ակտի երեք կետերի հստակեցման անհրաժեշտություն, նշեց. «Ադրբեջանը իր տեսակետն ունի, հայկական կողմն իր տեսակետը պետք է ունենա, և պետք է գան ինչ-որ ընդհանուր հայտարարի: Երբ վարչապետ Փաշինյանը պնդում է, որ ինքը չի կարող Արցախի փոխարեն բանակցել,  հայ հասարակության համար գուցե հաճելի է լսել նման հայտարարություն վարչապետից, բայց վերջնարդյունքում մենք կարող ենք ստանալ վտանգավոր բան: Կարծում եմ, որ միջնորդները նյարդայնանալու են այդպիսի հայտարարությունից և պահանջեն, որպես նախապայման՝ որպեսզի Արցախը բանակցի Ադրբեջանի հետ, Հայաստանը զորքերը հանի Արցախից: Ինչպես նաև երբ հայկական կողմը նշի, որ չունի լեգիտիմ իրավունք բանակցել Արցախի անունից, ապա դա կարող է հանգեցնել նրան, որ Ադրբեջանը հայտարարի՝ դուրս է գալիս բանակցային պրոցեսից, որովհետև Հայաստանի դիրքորոշումը դեստրուկտիվ է: Ադրբեջանը կստանա քարտ- բլանշ նոր պատերազմական գործողություն վերսկսելու համար»,- ասաց Բոզոյանը:

Քաղաքագետի կարծիքով, այդպիսի հայտարարությունները, ճառերը գուցե հանրության համար շատ գեղեցիկ  են հնչում, հանրությունը սիրում է լուրջ արտահայտություններ, սակայն բովանդակությունը չի հասկանում, որը վտանգավոր է. «Փաշինյանը ցանկանում է դուր գալ հասարակությանը և այնպիսի բաներ է արտահայտում, որով կարող է արժանանալ հանրության դրական վերաբերմունքին: Սակայն մեր ժողովորւդն  իր պատմության մեջ միշտ տուժել է դրա պատճառով: Մեր հասարակությունը երբեք բովանդակության մեջ չի մտել: Եթե մեր ժողովուրդը համառի չհասկանալու բովանդակությունը, ապա լուրջ խնդրի առջև կկանգնեցնի ինքն իրեն: Հանրությունը ևս պետք է պատկերացնի և պատասխանատվությունը կրի հնարավոր պատերազմական գործողությունների համար»,- ասաց Բոզոյանը:

Ամփոփելով՝ քաղաքագետը նշեց, որ կամ իշխանությունը չի հասկանում  վերոնշյալը, կամ հասկանում է և ներքին լսարանի համար է այսպիսի ելույթ ունենում: Այնուամենայնիվ, քաղաքագետը սխալ է համարում վարչապետ Փաշինյանի կողմից բանակցությունների գնալը և բովանդակության վերաբերյալ բանակցություն չունենալը. «Եթե գործիչը մի բան է ասում ներքին լսարանի համար, բայց բանակցային գործընթացին ռեալ մասնակցում է. դա նորմալ է: Սակայն եթե դու վիժեցնում ես բանակցությունները, դու մեղավոր ես դառնում և քարտ- բլանշ ես տալիս  Ադրբեջանին՝ պատերզամ վերսկսելու համար»:

Արմինե ԱՐՄԵՆԱԿՅԱՆ