Հայտնի է Ղազախստանի նախագահի նոր պաշտոնակատարի անունը

Ղազախստանի նախագահի լիազորությունները փոխանցվել են երկրի խորհրդարանի վերին պալատի նախագահ Քասիմ Ժոմարտ Տոկաևին: Այս մասին իր հրաժարականի ելույթում այսօր հայտարարել է Ղազախստանի նախագահ Նուրսուլթան Նազարբաևը։

Ավելի վաղ տեղեկացրել էինք, որ Ղազախստանի նախագահ Նուրսուլթան Նազարբաևը հրաժարական է տվել:

Նազարբաևը Ղազախստանը ղեկավարել է 1990 թվականից, 2015 թվականին նա վերընտրվել էր հինգերորդ ժամկետով:

Քասըմ-Ժոմարտ Տոկաևը նախկինում զբաղեցրել է Ղազախստանի վարչապետի, պետական քարտուղարի, արտաքին գործերի նախարարի պաշտոնները:

Ինչպես հաղորդում է Ղազախստանի խորհրդարանի պաշտոնական կայքը, 2013 թվականին Ղազախստանի նախագահ Նուրսուլթան Նազարբաևի հրամանով նշանակվել է երկրի խորհրդարանի Սենատի պատգամավոր և ընտրվել Սենատի նախագահ: 2017 թվականի սեպտեմբերի 14-ին կրկին վերընտրվել է Ղազախստանի խորհրդարանի Սենատի նախագահի պաշտոնում:

Մինչ Սենատի անդամ նշանակվելն ու նախագահ ընտրվելը Քասըմ-Ժոմարտ Տոկաևը զբաղեցրել է ՄԱԿ-ի գլխավոր քարտուղարի տեղակալի պաշտոնը, եղել է ՄԱԿ-ի Ժնևի բաժանմունքի գլխավոր տնօրենը:

Ղազախստանի նախագահ Նուրսուլթան Նազարբաևը մարտի 19-ին հայտարարել Է պետության ղեկավարի լիազորությունները վայր դնելու մասին: Ղազախստանի սահմանադրության համաձայն՝ երկրի նախագահի՝ ժամկետից շուտ պաշտոնից հեռանալու դեպքում նախագահի լիազորությունները մնացած ժամկետում իր վրա է վերցնում խորհրդարանի սենատի ղեկավարը։ Ղազախստանի Հանրապետության նախագահի լիազորություններն անցնում են Ղազախստանի խորհրդարանի Սենատի խոսնակ Քասըմ-Ժոմարտ Տոկաևին: