Ես կտրականապես դեմ եմ, որ Իրինա Ռոդնինայի անվան գեղասահքի դպրոցը անվանափոխվի․ Սերգեյ Համբարձումյան

Հասարակություն 23 Մարտ, 2019 12:11

Ինչպես հայտնի է Երևանի ավագանու՝ երեկվա արտահերթ նիստում «Լույս» խմբակցության անդամ Անի Խաչատրյանն առաջարկել է Իրինա Ռոդնինայի անվան գեղասահքի դպրոցը վերանվանել «Հայ-ռուսական գեղասահքի դպրոց»: Առաջարկության համար , ըստ Անի Խաչատրյանի, իբրև հիմք է հանդիսացել՝ ՌԴ Դաշնային ժողովի հայ-ռուսական միջխորհրդարանական հանձնաժողովի անդամ Իրինա Ռոդնինայի՝ փետրվարի 26-ին Բաքվում հակահայկական միջոցառմանը մասնակից լինելը և նրա ելույթը: Ի դեպ Իրինա Ռոդնինայի անվան գեղասահքի դպրոցը կառուցվել և անհատույց Երևանի քաղաքապետարանին է նվիրաբերվել ռուսաստանաբնակ հայազգի գործարար և բարերար, «ՄոնԱրխ» ընկերությունների խմբի հիմնադիր և գլխավոր տնօրեն Սերգեյ Համբարձումյանի սեփական միջոցներով և աջակցությամբ: Այդ նախագծի իրականացման համար մեր հայրենակիցը ներդրել է 7.5 միլիոն դոլար:

Հիշեցնենք, որ Իրինա Ռոդնինայի անվան գեղասահքի դպրոցի բացման արարողությունը տեղի է ունեցել 2015 թվականին: Թե որքանով է արդարացված Իրինա Ռոդնինայի անվան դպրոցի անվանափոխումը և կողմ է արդյո՞ք նման առաջարկի ընդունմանը` դպրոցի հիմնադիր Սերգեյ Համբարձումյանը, Slaq.am լրատվական կայքի լրագրողի հետ զրույցում նա իր դիրքորոշումը հայտնեց :

- Պարոն Համբարձումյան Երևանի քաղաքապետարանի երեկվա նիստում քննարկվել է ՝ Ձեր շնորհիվ և միջոցներով կառուցված Իրինա Ռոդնինայի անվան գեղասահքի դպրոցը անվանափոխելու և փոխարենը Հայ-ռուսական գեղասահքի դպրոց անվանելու առաջարկը. Դուք՝ որպես հիմնադիր, կո՞ղմ եք արդյոք նման առաջարկի ընդունմանը .

- Ես կտրականապես դեմ եմ, որ գեղասահքի դպրոցի անվանումը փոխվի, քանի որ այդ դպրոցի կառուցման հենց սկզբից քննարկումներ են եղել Իրինա Ռոդնինայի հետ և նրա հետ միասին մենք որոշել ենք կառուցել այդ դպրոցը, որպես նվեր Երևանին, որպես նվեր մեր երեխաներին և երբ դպրոցը ես կառուցել և նվիրել եմ Երևանի քաղաքապետարանին․ եղել է նախապայման իմ կողմից և միակ նախապայմանը , որ դպրոցը պետք է կրի Իրինա Ռոդնինայի անվանումը և այն չպետք է անվանափոխվի։

Իրինա Ռոդնինան Ռուաստանի Դաշնության Պետդումայի անդամ է և կարող է ունենալ քաղաքական տարբեր հայացքներ, նա նաև կուսակցական է և տարիներ շարունակ տիկին Ռոդնինան եղել է մեր ժողովրդի բարեկամը , տարբեր առիթներով ներկայացրել է պրոհայկական դիրքորոշումներ և չէի ցանկանա, որ ընդհամենը մեկ հայտարարության համար մենք փորձեինք այդ հայասեր կնոջը դարձնել մեր պետության կամ ժողովրդի թշնամին և եթե ապագայում տիկին Ռոդնինան դարձյալ պրոհայկական դիրքորոշումներ հայտնի, ապա ինչ՝ դարձյալ հետ ենք վերաանվանելո՞ւ և մարզական դպրոցը նրա անունո՞վ ենք կոչելու։

Ես արդեն իսկ զրույց եմ ունեցել Երևանի քաղաքապետարանի ներկայացուցիչների հետ և նրանց հայտնել եմ, որ եթե հարկ լինի կարող եմ անձամբ ժամանել Երևան և մասնակցել անվանափոխման հետ կապված քննարկումներին ուզում եմ կրկնել, որ իմ դիրքորոշումը հստակ է և ես կտրականապես դեմ եմ, որ դպրոցը անվանափոխվի, նաև ուզում եմ նշել, որ եթե այնուամենայնիվ իմ կարծիքը հաշվի չառնեն և դպրոցը անվանափոխեն ես խնդրելու եմ, որպեսզի դպրոցի շենքից հեռացնեն նաև այն պաստառը , որտեղ գրված է, որ այդ մարզադպրոցը կառուցել եմ ես՝ որպես բարերար, իմ համար դա սկզբունքային խնդիր է։