Հայ ծնողներին կսովորեցնեն ծնողավարություն

Այսօր՝ մարտի 23-ին «Երևան էքսպո» կենտրոնում բացվեց «Լույսի մոլորակ» մոր և մանկան կոնֆերանս-ցուցահանդեսը: Միջոցառումը կազմակերպվել էր «Իմ քայլը» հիմնադրամի հովանու ներքո, ՄԱԿ-ի Բնակչության հիմնադրամի, ՅՈՒՆԻՍԵՖ-ի հետ համագործակցությամբ։

ԼՈՒՐԵՐ․com-ի հետ զրույցում միջոցառման համակազմակերպիչ Մարիաննա Գալստյանը նշեց, որ այս միջոցառումն ուղղված է ծնողներին անհրաժեշտ տեղեկատվության տրամադրմանը, երեխայի դաստիարակությանն ու զարգացմանը:

«Մենք փորձել ենք մեկ հարթակի տակ բազում միջոցառումներ կազմակերպել։ Մեր գլխավոր նպատակն այն է, որ յուրաքանչյուր ծնող և երեխա գտնի իրեն հետաքրքրող հարցերի պատասխանները»։

Ներկաներին ողջունեց ՀՀ վարչապետի տիկին Աննա Հակոբյանը՝ նշելով, որ մեծ ուրախությամբ է մասնակցում այս միջոցառմանը:

«Այն, ըստ էության, աննախադեպ է Հայաստանում: Առաջին անգամ է, որ նման բովանդակությամբ խոշոր ցուցահանդես է անցկացվում, որտեղ հնարավոր է գտնել երեխաների խնամքին, զարգացմանը վերաբերող բազմաթիվ հարցերի պատասխաններ: Հայ մայրերը պետք է հնարավորություն ունենան մասնագետների հետ քննարկել երեխայի խնամքի հետ կապված հարցերը, ինչին էլ ուղղված է այս հարթակը»,- ասաց Աննա Հակոբյանը: 

Նա կարևորեց նման միջոցառումների շարունակական կազմակերպումը և դրանք մարզերում իրականացնելու գործընթացը։

Օրվա ընթացքում քննարկվելու են ծնողավարության, երեխաների նկատմամբ հոգեբանական ու ֆիզիկական բռնության հետևանքները և այլ թեմաներ: 

ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչ Ծովինար Հարությունյանը նշեց, որ արդեն 20 տարի է աշխատում են Հայաստանում՝ նպատակ ունենալով նպաստել այնպիսի միջավայրի ձևավորմանը, որտեղ յուրաքանչյուր հղիություն կլինի ցանկալի, յուրաքանչյուր ծնունդ կլինի անվտանգ և ապահով, յուրաքանչյուր դեռահաս, երիտասարդ կկարողանա իր ներուժը, տաղանդն ամբողջությամբ օգտագործել:

«Շատ ուրախ եմ տեսնել այսքան հետաքրքրված երիտասարդների, ծնողների, դեռահասների, այսքան հրաշալի մանուկների: Սա իսկապես եզակի միջոցառում է օգտակարը հաճելիի հետ համադրելու համար: ՄԱԿ-ի բնակչության հիմնադրամը մեծ սիրով միացել է այս օգտակար ու բարի նախաձեռնությանը՝ կարևորելով նպատակը, այն է ՝ հանուն ավելի կիրթ ու առողջ ապագայի: Ամեն ինչ արվել է, որը տոն դառնա յուրաքանչյուր մասնակցի համար»,-ասաց Ծովինար Հարությունյանը:

Պաշտոնական արարողությունից հետո հյուրերն այցելեցին տաղավարներ, ծանոթացան կրթական համալիրների, զարգացման, հոգեբանական և ֆիզիկական առողջություն ապահովող կենտրոնների ծառայություններին։