«Որին շատ ես օգնում՝ նա է բողոքում»․ Մերձավանի ղեկավարը պատասխանում է իր հասցեին հնչող մեղադրանքներին

Արմավիրի մարզի Մերձավան համայնքի բնակչի կողմից ահազանգը, թե համայնքի ղեկավար Լևոն Գրիգորյանի որդին համայնքի սեփականություն հանդիսացող հողատարածքներից հող է գողանում, համայնքի ղեկավար Լևոն Գրիգորյանը ժխտում է։ Վերջինս ԼՈՒՐԵՐ․com-ի թղթակցի հետ զրույցում զրպարտանք համարեց իր և իր որդու հասցեին հնչող մեղադրանքները։

Նշենք, որ մեզ ահազանգով դիմել էր Մերձավան համայնքի բնակիչներից մեկը՝ ասելով, թե համայնքի ղեկավարի և նրա որդու կողմից ապօրինություններ են տեղի ունենում։

«Ինձ հակառակ ընդդիմադիր մարդիկ, ոչ բոլորն իհարկե, նման լուրեր են տարածում։ Եթե լիներ նման բան՝ 20-30 հոգի դուրս կգային համայնքի ղեկավարի դեմ՝ ինչպես լինում է։ 23 տարվա ընթացքում ես միշտ ժողովրդի կողքին եմ եղել, իմ երեխաները՝ ևս։ 2016 թվականին եղել են ընտրություններ, իմ դեմ երկու պատգամավոր է աշխատել՝ Մհեր Սեդրակյանը և Առաքել Մովսիսյանը, և իրենց ներկայացուցիչը եղել է իմ հակառակորդը, սակայն, ես 70-30 հարաբերակցությամբ հաղթել եմ այդ ընտրություններում։ Թեպետ նրանք ողջ լծակներն օգտագործեցին, սակայն արդար ընտրություններով ես անցել եմ»,- ասաց համայնքի ղեկավարը։ 

Լևոն Գրիգորյանը չհերքեց, որ իր որդիները զբաղվում են հանքարդյունաբերությամբ և նկատեց, որ Վոլոդյա Գրիգորյանը գյուղում վարձակալած հող ունի, որը մշակում և տեղափոխվում է Երևան՝ հանքարդյունաբերության նպատակով․ «Ընդերքօգտագործման հողերը մեզ մոտ վարձակալությամբ են տրվում։ Իմ որդին ենթավարձակալությամբ է վերցրել և ունի 19 աշխատող։ Նրանք աղում են այդ հողն ու հումքը տեղափոխում են։ Դա տեղի է ունենում ամբողջովին օրինական ճանապարհով։ Օրինականությունն ապացուցող բոլոր փաստաղթերն առկա են, որը նաև մարզպետարան ենք ուղարկել։ Փոքր տղաս էլб դեռևս 2003 թվականիցб քարի վերամշակման արտադրամաս ունի, այնտեղ էլ 7 աշխատող կա։ Անցած տարի տղաս իր միջոցներով 8 դասարան է վերանորոգել։ Այդպես, ժողովրդի կողքին կանգնած, օգնում ենք»,- ընդգծեց Գրիգորյանը։

Ինչ վերաբերում է քրեական հեղինակությունների կողմից աջակցություն ստանալուն՝ համայնքի ղեկավարը նշեց, որ Ժիրայր Բրուտյանին բացարձակապես չի ճանաչում․ «Իսկ Գրիգոր Գրիգորյանն իմ տղայի մանկության ընկերն է, դրա մեջ ի՞նչ կա։ Բայց որևէ աջակցությունը բացառվում է, նման բան չկա։ Մենք մարդ չե՞նք, մենք լեզու չունե՞նք, որ մեր մոտ մարդ բերենք»,- ասաց Գրիգորյանը։

Հարցին՝ արդյո՞ք իրականությանը համապատասխանում են իր կողմից էժան գներով համայնքին պատկանող հողատարածքներ վաճառելը, համայնքի ղեկավարը թեպետ չժխտեց, որ վաճառք եղել է, սակայն պատասխանեց, որ հողակտորները մրցութային կարգով արժեքից ավելի գնահատված է վաճառել․ «Մեր մոտ կա կարգ, որի հիման վրա մենք շարժվում ենք։ Ես նման բան չեմ կարող անել։ Օրենքը սահմանում է՝ 50 տոկոսից ոչ պակաս պետք է աճուրդը սահմանել, բայց ես 100 տոկոսից պակաս հողի աճուրդ չեմ կազմակերպել։ Մեր մոտ հողի սեփականաշնորհում չի կատարվում,  բոլորը հողերը  համայնքային սեփականություն են և տրվում են վարձակալությամբ։ 2003 թվականից Եղվարդի գինեգործարանին էլ վարձակալությամբ հող ենք տրամադրել, որտեղ 100 հա խաղողի այգի է հիմնված։ Այնտեղ շուրջ 50-60 մերձավանցիներ են աշխատում։ Ինչ վերաբերում է բնակչի կողմից նշված լիճը ցամաքելուն՝ նշեմ, որ դա լիճ չի եղել, այլ եղել է ձորակ, որը քայքայվել է։ Խորհրդային տարիներից սկսած այդ տարածքն իմ եղբայրն օգտագործում էր։ Բայց միայն իմ եղբայրը չի օգտագործել, այդտեղ մի քանի բնակիչներ կան, որոնք ժամանակին օգտագործել են։ Ես բոլորին բերել եմ օրինական դաշտ։ Մրցութային կարգով՝ արժեքից ավելի բարձր գնահատված գնել են այդ հողերը, վա՞տ բան եմ արել։ Այդ հողերը անմշակ, քարոտ հողեր են եղել, եղբայրս հող է բերել, որ այգի հիմնի»,- ասաց Գրիգորյանը և ամփոփելով հավելեց, որ հիմնադրված որևէ մեղադրանք չկա և չի եղել մի դեպք, որ որևէ բնակիչ մոտենա և դիմի այնպիսի խնդրով, որ լուծում չստանա․ «Եթե բան կա ասելու՝ թող անմիջապես ինձ մոտենան, ասեն, որ կա այսպիսի խնդիր։ Այդ բողոքողներից որևէ մեկը չի մոտեցել։ Որին շատ օգնում ես՝ նա է բողոքում»։