ԼՂ-ի ու Ադրբեջանի միջև երկխոսությունը չպետք է ընդհատվի․ Փաշինյան (տեսանյութ)

 ՀՀ վարչապետ Նիկոլ Փաշինյանը Եվրոպայի խորհրդի խորհրդարանական վեհաժողովի գարնանային նստաշրջանի լիագումար նիստի ընթացքում ընդգծեց Լեռնային Ղարաբաղի հիմնահարցի կարգավորման բանակցությունների սեղան Արցախի վերադարձի կարևորությունը: Փաշինյանը նշեց, որ չի կարող խնդիրը լուծվել, առանց Արցախի մասնակցության:

«Մեր ընկալմամբ, այսօր կարևորագույն մի քանի հարց կա, որոնց պետք է պատասխանենք  խաղաղության օրակարգն ինստիտուցիոնալ առումով ուժեղացնելու համար, և այդ հարցերից մեկը ԵԱՀԿ Մինսկի խմբի համանախագահության ֆորմատի լիարժեք գործարկումն է, որը ենթադրում է նաև ԼՂ ներկայացուցիչների մասնակցությունը խաղաղ կարգավորման գործընթացին, որովհետև շատ դժվար է հասկանալ, թե ինչպես ենք մենք պատրաստվում հարցը կարգավորել, առանց կոնֆլիկտի առաջնային և հիմանական կողմին լսելու, առանց նրա հետ խոսելու: Մեր քայլերն ուղղված են նրան, որ ԵԱՀԿ ՄԽ համանախագահության շրջանակներում վերականգնենք երկխոսությունը Ադրբեջանի և Լեռնային Ղարաբաղի միջև: ԼՂ-ի ու Ադրբեջանի ղեկավարների միջև տեղի է ունեցել նաև ուղիղ հանդիպում, այդ պրակտիկան եղել է: ԼՂ ընտրված ներկայացուցիչները շատ երկար ժամանակ, և ըստ էության միշտ ներգրավված են եղել բանակցային գործընթացում: Սովորաբար ասում են, որ մինչև 1998թ., բայց ես կարող եմ ասել, որ մինչև 2018թ. Ղարաբաղի ներկայացուցիչները ներկա են եղել բանակցային գործընթացում: Ռոբերտ Քոչարյանը Հայաստանի նախագահ դառնալուց առաջ եղել է Լեռնային Ղարաբաղի ընտրված նախագահը, դրանից հետո Սերժ Սարգսյանն է ներկայացրել Հայաստանը, բայց նա եղել է նաև Ղարաբաղի առաջնորդներից մեկը, և մենք, ըստ էության, ունենք մի վիճակ, երբ Լեռնային Ղարաբաղը բանակցային ողջ գործընթացի ընթացքում ներկայացված է եղել բանակցությունների սեղանի շուրջ: Եվ մեր խնդիրն է այսօր ստեղծել պայմաններ, որ այդ երկխոսությունը ԼՂ-ի ու Ադրբեջանի միջև չընդհատվի, և սա շատ կարևոր պարտավորություն է»,- ասաց Փաշինյանը:

Վարչապետը կարևորեց նաև իր ու Ադրբեջանի նախագահի միջև տեղի ունեցող երկխոսությունները:   

«Վերջին շրջանում խաղաղության բանաձևը կյանքի կոչելու առաջարկներ ներկայացնելը մեր ադրբեջանցի գործընկերներին, և հանրությանը, մեր ամենակարևոր անելիքներից մեկն է, և ես ուրախ եմ, որ մենք Ադրբեջանի նախագահ Իլհամ Ալիևի հետ կարողացել ենք բավականին ուղիղ, անկեղծ, ազնիվ և կառուցողական խոսակցություն ծավալել: Ցավոք, դեռևս ընդհանուր պատկերացումներ չունենք Ղարաբաղի հարցի կարգավորման նրբությունների մեխանիզմների մասին, բայց այն, որ մենք կարողացել ենք կառուցողական, անկեղծ քննարկման մթնոլորտ ստեղծել, դա արդեն իսկ բավական լավ է»,- նշեց Փաշինյանը: