Փորձ է արվում իրականությունը խեղաթյուրել․ Արծվիկ Մինասյանը՝ ցեմենտի տուրքի մասին (տեսանյութ)

Հայաստանում ցեմենտի արտադրությամբ զբաղվող արդյունաբերական խոշոր արտադրողները՝ «Արարատ ցեմենտ»-ն ու «Հրազդան ցեմենտ»-ը փակման վտանգի առաջ են կանգնած: Պատճառը հարևան Իրանից մեծ քանակությամբ ներկրվող ցեմենտն է, ինչի հետևանքով զգալի նվազել են տեղական ցեմենտի իրացման ծավալները: ԱԺ տնտեսական հարցերի մշտական հանձնաժողովում հավանության արժանացավ գործադիրի ներկայացրած օրենսդրական նախաձեռնությունը՝ ներկրված ցեմենտի մաքսատուրքերը բարձրացնելու վերաբերյալ, բայց կա մեկ այլ խնդիր. պետտուրքից ազատվում է ցեմենտի պատրաստման համար օգտագործվող հիմնական հումքը՝ ներկրվող կլինկերը:

ՀՅԴ ոլորտային մասնագիտական հանձնախմբերի համակարգող Արծվիկ Մինասյանի կարծիքով, փոխանակ խթանեն տեղական արտադրանքը, նախագիծ են ընդունում, որը վնասում է տեղական արտադրողին՝ կդնելով անհավասար պայմանների մեջ, ինչպես նաև վնասում է տնտեսությանը․ «Ստացվում է՝ մենք, մեր կառավարությունը, որը մշտապես խոսում է տեղական արտադրությունը զարգացնելու մասին, ԱԺ մեծամասնությունը և հանձնաժողովը ձախողում է այս ծրագրի իրականացումը։ Իմ խորին համոզմամբ, ԱԺ-ում ցեմենտի համար առաջարկվող պետական տուրքի պարագայում մենք գործ ունենք տնտեսությանը կազմակերպված հարված հասցնելու գործընթացի հետ։ Որևէ կապ չունի, թե ով է արտադրողը։ Եթե դու ունես տեղական հումքի վրա հիմնված արտադրություն, դու պետք է առավելագույնս անես, որ այդ արտադրությունը զարգանա, իսկ ապրանքը դառնա մրցունակ։ Ես կարծում եմ՝ պատգամավորների մի մասը չգիտի՝ ի՞նչ շահեր է ինքը սպասարկում, գուցե մի մասը բարեխիղճ մոլորության մեջ է՝ չիմանալով ում է օժանդակում, մի մասը գուցե գիտի և կանխամտածված է դա անում»,- ասաց նա՝ նշելով, որ եթե այս նախագիծը ինչ տեսքով որ կա, ընդունվի՝ որևէ օգուտ տեղական արտադրությանը չի տալու, այլ նպաստելու է 2 խոշոր արտադրողների փակմանը, իսկ աշխատակիցները հայտնվելու են գործազուրկի կարգավիճակում։ 

Նրա խոսքով՝ քննարկումների ընթացքը անձնավորվել է, փորձ է արվում իրականությունը խեղաթյուրել, ներկայացվում է մեկ կամ երկու գործարարների շահերի հետապնդում, մինչդեռ  ցեմենտը, որպես ռազմավարական նշանակության ապրանք, անհրաժեշտ է տեղական արտադրության պաշտպանության համար։