Գլաձորցիների ճնշող մեծամասնությունը դեմ է մետաղական հանքարդյունաբերությանը․ ՀԲՃ

Վայոց Ձորի մարզի Գլաձոր խոշորացված համայնքի բնակիչները համայնքի ղեկավարին եւ ավագանուն են հանձնել 2152 բնակչի ստորագրությամբ հանրագիր՝ մետաղական հանքարդյունաբերությունն արգելելու եւ համայնքն էկո-տնտեսական տարածք դարձնելու վերաբերյալ։ Այս մասին հայտարարություն է տարածել Հայկական բնապահպանական ճակատը:

Հայտարարությունում նաեւ ասվում է.

Որպես ուղիղ ժողովրդավարության դրսեւորում՝ Գլաձոր համայնքի բնակիչները համայնքի ավագանուց եւ ղեկավարից խնդրում եւ պահանջում են․

1․ Ընդունել որոշում, որով կարգելվի եւ ապագայում կբացառվի Գլաձոր համայնքի վարչական տարածքում իրականացնել մետաղական հանքարդյունաբերության հետ կապված հետախուզական, առավել եւս հանքավայրերի շահագործման հետ կապված աշխատանքներ:

2․ Համայնքների անդամներին ներգրավելով՝ մշակել Գլաձորի ու Վայոց Ձորի մարզի էկոլոգիապես կենսակայուն եւ կանաչ տնտեսության զարգացման համալիր ծրագիր, որի իրականացման համար պատրաստ են աջակցել ՀՀ պետական կառավարման ու տեղական ինքնակառավարման մարմիններին:

Մանրամասները՝ տեղացիների տրամադրած տեսանյութում:

Գլաձոր համայնքը որպես շրջակա լեռներում մետաղական հանքարդյունաբերական գործունեության ազդակիր համայնք 2015թ․-ից ի վեր պայքարում է մաքուր բնական միջավայր ունենալու իրավունքի եւ սեփական տարածքում որոշումներ կայացնելու ինքնավարության համար (նախապատմությունը՝ տես այստեղ)։

Մետաղական հանքարդյունաբերությունն իրենց բնական միջավայրերում թույլ չտալու նախաձեռնությամբ մինչ այժմ հանդես են եկել Հայաստանի մի շարք համայնքներ՝ 2018թ․ գարնանը Նոյեմբերյանը, իսկ 2018թ․ աշնանը՝ Ջերմուկը։ Նոյեմբերյանի ավագանին արգելել է ցանկացած հանքարդյունաբերական գործունեություն Նոյեմբերյանի վարչական տարածքում, իսկ Ջերմուկի ավագանին հավանություն է տվել համայնքի բնակիչների ճնշող մեծամասնության նման պահանջով հանրագրին։

Վայոց Ձորի մարզում շարունակվում է նախատեսված եւ պոտենցիալ մետաղական հանքարդյունաբերական ծրագրերի դեմ ստորագրահավաքի գործընթացը։

Հանրագրի ամբողջական բովանդակությանը կարող եք ծանոթանալ այստեղ։