Սա ևս մեկ հնարավորություն է` լսելու քաղաքացու հարցերը. ԱԽ քարտուղար

ՀՀ Անվտանգության խորհրդի քարտուղար Արմեն Գրիգորյանի համար Քաղաքացու օրը ևս մեկ հնարավորություն է խոսելու քաղաքացու հետ և լսելու նրա խնդիրները: Այս մասին Գրիգորյանն ասաց ապրիլի 27-ին, լրագրողների հետ զրույցում:

«Սա ևս մեկ հնարավորություն է կարևորելու քաղաքացուն, խոսելու քաղաքացու դերի մասին: Եվ նույնիսկ հնարավորություն է՝ հանդիպելու, լսելու քաղաքացու հարցերը: Եվս մեկ առիթ է կարևորելու քաղաքացուն ու խոսելու քաղաքացու հետ: Ինձ համար կատարյալ է այն քաղաքացին, որը խոսում է խնդիրների մասին և ակտիվ է, փորձում է վերահսկել և պահանջատեր լինել իշխանության հանդեպ »,- ասաց Գրիգորյանը:

Հայաստանում առաջին անգամ ապրիլի վերջին շաբաթ օրը նշում են որպես Քաղաքացու օր: Ապրիլի 27-ին տոնի առիթով ողջ հանրապետությունում նախատեսված են բազմաբնույթ միջոցառումներ:

Կառավարության կողմից ներկայացված «Տոների և հիշատակի օրերի մասին» օրենքում լրացում կատարելու մասին օրենքի նախագիծը շրջանառության առաջին իսկ օրից բուռն քննարկումների առիթ էր դարձել: Թե քաղաքական տարբեր ուժերի, թե քաղաքացիների կողմից հնչել էին կողմ և դեմ կարծիքներ: Խորհրդարանում ՀՀ արդարադատության նախարար Արտակ Զեյնալյանը, ներկայացնելով նախաձեռնության նպատակը, նշել էր, որ 2018-ի ապրիլին հարյուր հազարավոր քաղաքացիներ միախմբված, առանց նախապես պայմանավորվածություն ձեռք բերելու կարողացան իրականացնել հեղափոխություն՝ թավշյա, առանց բռնության: Եվ գործադիր իշխանությունը գտնում է, որ այդ երևույթը անհրաժեշտ է ամրագրել որպես տոն նաև այն նպատակով, որ այսուհետև Հայաստանում իշխանությունը պետք է ձևավորի դրա տերը՝ քաղաքացին, և պետք է նշել Քաղաքացու տոն: Արդյունքում երկարատև քննարկումներից հետո նախագիծն օրենսդիրն ամբողջությամբ ընդունեց ապրիլի 9-ի նիստում:

Ապրիլի 19-ին կառավարության որոշմամբ` ՀՀ քաղաքացու օրվան նվիրված միջոցառումների անցկացման համար հատկացվեց 124 մլն դրամ: