Հնարավոր է միլիարդ դոլարի օգնություն ստանանք, բայց ունենանք քաղաքական կորուստներ. քաղաքագետը՝ «Մետաքսի ճանապարհ»-ի մասին

Օրերս Պեկինում ավարտվեց  «Մետաքսի ճանապարհ» նախագծի 2-րդ ֆորումը: «Մետաքսի ճանապարհ»-ը  Չինաստանի՝ Ասիայի և Եվրոպայի հետ կապող առևտրային մայրուղին է: Հայաստանը նախկինում հանդիսանում էր մայրուղու խաչմերուկը: «Մետաքսի ճանապարհը» կապող օղակ է արևելքի և արևմուտքի երկրների միջև:

Այս թեմայի շուրջ ԼՈՒՐԵՐ.com-ի հետ   զրուցում քաղաքագետ Մանվել Սարգսյանը կարծիք հայտնեց, որ այդ ծրագիրը հատուկ կազմակերպված է, պետությունների մոտ կան  ձգտումներ նոր ֆորմատներ ստեղծելու: Քաղաքագետի խոսքով, պետք է հստակ հասկանալ, թե ինչ ծրագրեր կան, և Հայաստանի հանդեպ կա՞ հետարքրություն, թե՝ ոչ:

«Միանշանակ պետք է ունենալ որոշակի ծրագրեր,  բայց  դրանք լուրջ հարցեր են: Դա միայն մեկ ուղղություն չէ, և Հայաստանը որևէ ուղղությամբ լուրջ ծրագրեր չուներ: Տարիներ շարունակ թմբկահարում էին Հայաստան-Իրան  երկաթուղու, Իրանի հետ լավ հարաբերություններ ունենալու հարցերը, բայց դրանք ուղղակի խոսքեր էին, կոնկրետություն, մշակված ծրագրեր չկային»,- անդրադառնալով անհրաժեշտ ծրագրերին, ասաց Սարգսյանը:

ՀՀ նախկին վարչապետ, տնտեսագետ Հրանտ Բագրատյանի «խորհրդի» և հնարավոր ռիսկերի մասին խոսելով, քաղաքագետն ասաց, որ Հայաստանի հանդեպ հետաքրքրություն առաջացնելու համար պետք է հստակ մշակված ծրագրեր ունենալ, անհրաժեշտ է ուսումնասիրել բոլոր հարցերն ու ռիսկերը:

«Հայաստանին չպետք է խցկել, Հայաստանը պետք է ներկայանա որևէ առաջարկով, փորձի հետաքրքրություն առաջացնել: Պարոն Բագրատյանը և նման այլ մասնագետներ, իրենք էլ կարող էին նպաստել այդ ամենին, հնարավորինս ուշադրություն գրավել, հետաքրքրություն առաջացնել: Չինաստանը մի փոքր պրոբլեմատիկ է, կապված եվրոպական տարբեր երկրներ՝ Ֆրանսիայի, Գերմանիայի հետ հարաբերությունները կարգավորելու ընթացքում նկատվեց, որ գոյություն ունեն մեծ խնդիրներ: Պատճառն այն է, որ ռիսկային է, թե ամեն ինչ ինպես կավարտվի՝ լավ կլինի, վատ կլինի: Գիտենք, որ Ամերիկան և Չինաստանը տնտեսական պատերազմի մեջ են, պետք է հասկանալ, թե այս ամենը ինչ հետևանքներ կունենա: Բացի դրանից, կան քաղաքական բաղադրիչներ: Այնպես չէ, որ ուղղակի պետք է գնալ-մասնակցել ու վերջ: Այդ ամենը կարող է հանգել անգամ քաղաքական կորուստների»:

Մանվել Սարգսյանը շեշտեց, որ ռիսկերից խուսափելու համար պետք է մանրամասն ուսումնասիրել քաղաքական բաղադրիչները: Հայաստանի համար ռիսկային են նաև ԱՄՆ-ի, Ռուսաստանի և Իրանի հետ առկա հարաբերությունները:

«Հնարավոր է՝ միլիարդ դոլարի օգնություն ստանանք, բայց ունենանք քաղաքական կորուստներ, որոնք ավելի կարևոր կարող են լինել: Հենց  Հնդկաստանի դեպքում. նրանք կարևորել են այդ քաղաքական բաղադրիչը, քանի որ իրենք խնդիրներ ունեն Ղազախստանի հետ, իսկ Չինաստանը  դրական հարաբերություններ ունի: Պետությունները կշեռքին են դնում, թե իրենց համար որն է կարևոր»: