Հակառակորդը կրակել է Բաղանիսի ճանապարհի ուղղությամբ

Տավուշի մարզի Բաղանիս համայնքի ուղղությամբ հակառակորդը կրակոցներ է հնչեցրել։ Տեղեկությունը ԼՈՒՐԵՐ․com-ի հետ զրույցում ասաց Բաղանիսի համայնքապետ Նարեկ Սահակյանը։

«Կեսօրին՝ 13։00-14։00-ի միջանկյալ հատվածում կրակել են Իջևանի կողմից մինչև Բաղանիս հասնող՝ Ոսկեպար-Բաղանիս միջպետական ճանապարհի վրա։ Գյուղի ուղղությամբ կրակոցներ չեն եղել։ Այս պահին իրավիճակը հանգիստ է»,- ասաց Նարեկ Սահակյանը՝ նշելով, որ կրակահերթը կարճ է եղել։

Համայնքապետը նշեց, որ գյուղը վնասներ չի կրել, իսկ ճանապարհն արդեն բաց է։

Նրա խոսքով՝ վերջին շրջանում իրավիճակը բավականին հանգիստ է եղել և մի քանի ամիս կրակոցներ իրենց համայնքի ուղղությամբ չեն հնչել․ «Վերջին անգամ Բաղանիսի ուղղությամբ ադրբեջանական կողմը կրակ է բացել 2018 թվականի սեպտեմբերի 12-ին»,- ասաց Սահակյանը: