Իմքայլական պատգամավորի հանրապետական անցյալը

«Իմ քայլի» պատգամավոր, ՔՊ անդամ Գևորգ Պապոյանի անդամակցությունը ՀՀԿ-ին՝ դադարեցվել է 2018թ․ հուլիսի 3-ին։ Այս մասին ԼՈՒՐԵՐ․com-ի հետ զրույցում փոխանցեցին ՀՀԿ-ից։ 

«Գևորգ Պապոյանը, որպես կուսակցական, ՀՀԿ-ին անդամակցել է 2005 թ.-ին, իսկ 2018-ի կեսերին Արագածոտնի մարզի տարածքային գրասենյակի որոշմամբ հեռացվել է կուսակցությունից։ Որպես այդպիսին՝ անդամակցությունը դադարեցնելու դիմում իր կողմից չենք ստացել»,-ասացին ՀՀԿ-ից։

ԼՈՒՐԵՐ․com-ը իմքայլական պատգամավոր Գևորգ Պապոյանից խնդրեց պարզաբանել իր և ՀՀԿ-ի հակասական հայտարարությունները, քանի որ ինքն ասել էր՝ ՀՀԿ-ին անդամակցությունը դադարեցրել է 2007-ին, պատգամավորը պատասխանեց․ «2007թ․ վերջից հետո երբևէ ՀՀԿ գրասենյակ չեմ գնացել, ՀՀԿ-ի հետ որևէ կոնտակտ չեմ ունեցել, ՀՀԿ-ի հետ կապված որևէ գործունեությամբ չեմ զբաղվել։ Երբ սկսել է ժողովրդական շարժումը` իմ շրջապատում հայտարարել եմ դրա մասին և հիմա չեմ հիշում՝ դիմում ներկայացրել եմ, թե ոչ, բայց բացարձակապես որևէ գործունեությամբ չեմ զբաղվել։ Այդպես եթե լիներ՝ մինչև հիմա էլ կարող են ասել՝ իրենց անդամ եմ, սա ի՞նչ տրամաբանություն է։ Ես ՀՀԿ-ին անդամակցել եմ երևի թե 1 տարի՝ 2006-2007 թթ․, այդ ժամանակ 18 տարեկան էի»,- նշեց նա։

Անդրադառնալով ՀՀԿ-ին ֆիկտիվ անդամակցելու ձևակերպմանը, պատգամավորն ասաց, որ իր ընկերների հորդորով է միացել ՀՀԿ-ին, սակայն1 տարի անց հասկանալով, որ «այդ կուսակցությունը, իրենց գաղափարները, կոռուպցիոն մեխանիզմներն» իրենը չեն՝ միացել է ժողվրդական շարժմանը՝ մարտի 1-ին։

Դիտարկմանը՝ այսինքն ինչ-որ մեկի հորդորո՞վ է այս կամ այն կուսակցություն մտնում, հնարավո՞ր է ՔՊ անդամ դառնալը ևս որևէ մեկի հորդորով է պայմանավորված, պատգամավորը բացասական պատասխանեց․ «18 տարեկանում, երևի թե ինչ-որ տեղ նորմալ է կամ գուցե  աննորմալ, ինչ-որ կա՝ այն եմ ասում»։

Տարածված տեղեկությունները, թե Գևորգ Պապոյանի հայրը ևս ՀՀԿ անդամ է եղել, ավելին՝ Էդուարդ Շարմազանովի դասախոսը, և վերջինիս խնդրանքով էլ նրան կուսակցություն են ընդունել, Պապոյանը սուտ որակեց․ «Նման բան չկա, չի եղել»,-ասաց նա։

Հավելենք, որ չնայած պնդումներին, որ Գևորգ Պապոյանը 2008 թվականին մասնակցել է Լևոն Տեր-Պետրոսյանի տան մոտ տեղի ունեցած պիկետներին և դրանք ապացուցող բազմաթիվ նկարներ ու տեսանյութեր կան՝ պատգամավորը շարունակում է հերքել դրանք:

Սոնա Հարությունյան

Լուսանկարը՝ armdaily.am-ի