«168 ժամ». Մարզպետի արկածները շարունակվում են

«168 ժամ» թերթը գրում է.

«Արարատի մարզպետ Գարիկ Սարգսյանը (Կոկորդիլոս՝ մականունով) հերթական առիթն է ստեղծել՝ որ «փայլի» լրատվադաշտում: 168.am-ին հայտնի է դարձել, թե ինչ մեթոդներ է գործի դրել Արարատի մարզպետը՝ Արամայիս Գրիգորյանի եւ մյուս մարզպետների նշանակած կադրերից ազատվելու համար: Սակայն ամենազավեշտալին, մեր աղբյուրի թված դեպքերի մեջ, տեղի է ունեցել մարտին: Գարիկ Սարգսյանը մարզպետարանի աշխատակազմի ղեկավարին պատժել է իր գրությանը 1 րոպե ուշացումով պատասխանելու համար. կանչել, ասել է՝ հետդ չեմ ուզում աշխատել, հեռացիր: Եվ սա՝ այն դեպքում, երբ պետական համակարգում ներդրված «մալբրի» (Mulberry) էլեկտրոնային կառավարման համակարգը թույլ է տալիս գրությանը պատասխանել նաեւ 24 ժամվա ընթացքում: Աշխատակազմի ղեկավար Արմեն Դերմոյանը պարզաբանում, գրավոր հիմնավորում է պահանջել մարզպետից, որպեսզի իր քայլերի հաջորդականությունը հասկանա: Հոխորտացող մարզպետը դեմ առ դեմ հաշիվ պահանջողին այդպես էլ ի վիճակի չի եղել բացատրել, թե ինչ «կրիմինալ կա մեկ րոպե ուշացումով շեֆին արձագանքելու մեջ»:

Փակուղային վիճակում «շեֆին» օգնության են հասել մարզպետարանի մյուս աշխատակիցները՝ հասկացրել են, թե՝ ծառայողական քննություն նշանակիր, թող գնա՝ չափը ճանաչի, որ իմանա՝ օրենքի լեզվով հետդ խոսելն ինչ բան ա… Շաբաթներ շարունակ, օդից կախ, անորոշ կարգավիճակում, ասում են, Դերմոյանը գալիս-գնում էր մարզպետարան, մինչեւ որ ծառայողական քննությունն անցավ:

Արման Դերմոյանը շարունակում է պաշտոնավարել մարզպետարանի աշխատակազմի ղեկավարի պաշտոնում եւ դեռ անցած տարվանից ժամանակավոր պաշտոնակատարի (ժ/պ) կարգավիճակ ունի: Ի դեպ, լրիվ առանձին թեմա է նրան այս պաշտոնում չհաստատելու պայմանը: Դերմոյանին ներկայիս կարգավիճակում երկար պահելու պատճառը հետաքրքիր նախապատմություն ունի:

Մարզպետի խորհրդական Լիլիթ Միրզախանյանը, ով, աշխատակիցների խոսքով՝ փաստացի իրականացնում է աշխատակազմի ղեկավարի գործառույթները, բաղձալի բարձր պաշտոններ նվաճելու համար ջանացել է, բայց ստաժը բավարարելու խնդիր ունի։ Հեղափոխական մարզպետը նրան տեսնում է միմիայն աշխատակազմի ղեկավարի պաշտոնում, այդ պաշտոնից բխող հանձնարարականներ է տալիս նրան, սակայն Միրզախանյանը՝ քաղծառայողի մասին օրենքի պահանջից ելնելով՝ ստիպված է դեռ երկար սպասել: Նշենք, որ իր ազգականներից շատերին է Գարիկ Սարգսյանը մարզպետարանում պաշտոններ բաշխել, ընդհուպ՝ բաջանաղին նշանակելով տեղակալ: Եվ այդ հաջողակ ազգականներից մեկը նաեւ Լիլիթ Միրզախանյանն է:

Լիլիթ Միրզախանյանը մարզպետի մորաքրոջ հարսն է, միջավայրում խոսում են, թե Լիլիթի մյուս առավելությունը մարզպետի տված բացառիկ իրավունքներն են, որով օժտված է թե՛ մարզպետարանի աշխատակիցների շրջանում, եւ թե՛ ազգականների համար, իսկ թե ինչո՞ւ, աղբյուրը դեռեւս լռում է:

Նշենք, որ հեղափոխությունից հետո Նոր կյանքի գյուղապետից միանգամից մարզպետի պաշտոնին հասած Գարիկ Սարգսյանը շատ անգամներ է օգտվել ընտանիքի քավորի՝ Նիկոլ Փաշինյանի բարեհաճությունից: Նրան ներվել են մի շարք սկանդալային պատմություններ, հայտնի միջադեպը՝ Փաշինյանի քարոզարշավի ժամանակ, մարզում իրավիճակին չտիրապետելու հայտնի պատմությունը՝ կապված «40 հազար հա կաթիլային համակարգով ոռոգվող տարածքների հետ»:

Նիկոլ Փաշինյանը բազմաթիվ անգամներ է հայտարարել, որ Գարիկ Սարգսյանի համար ամաչելու փոխարեն՝ հպարտանում է, քանի որ նախկին իշխանության ռեժիմին հաղթած գյուղապետի միակ թեկնածուն է եղել: Եվ այսօր կուսակցությանը 22.000 ձայն բերած Գարիկ Սարգսյանով է հիանում Փաշինյանը. ստացվում է՝ իշխող «Քաղաքացիական պայմանագիր» կուսակցության առաջնորդը հիանում է թիմակցով, մինչդեռ գործադիրի ղեկավարը պիտի հպարտանար իր նշանակած մարզպետի աշխատանքային ջիղով»:

Առավել մանրամասն՝ թերթի այսօրվա համարում