Շարժական սրճարանների ներկայացուցիչները հանդիպում են պահանջում վարչապետի հետ (լուսանկարներ)

Կառավարության շենքի դիմաց բողոքի ակցիա են իրականացնում շարժական սրճարանների ներկայացուցիչները։

Նրանք վարչապետ Նիկոլ Փաշինյանի հետ հանդիպում են պահանջում։ Բողոքի ակցիայի նպատակն այն է, որ ՀԷՑ-ի կողմից իրենց ժամանակավոր թույլտվություններ տրվեն՝ հնարավորություն ընձեռելով ապահովել շրջիկ սրճարանների աշխատանքի բնականոն ռեժիմը։

ԼՈւՐԵՐ․com-ի հետ զրույցում շարժական սրճարանների ներկայացուցիչները նշեցին, որ այս պահին 100-ից ավել աշխատող գործազուրկ է, քանի որ քաղաքապետարանի պահանջով ՀԷՑ-ը հոսանքազրկել է իրենց առևտրի կետերը։

Հարցին, թե ի՞նչ հիմնավորմամբ, սրճարաններից մեկի ներկայացուցիչ Արթուր Ռաֆայելյանն ասաց, որ անօրինական են համարում իրենց գործունեությունը․ «Պայմանագիր ունենք կնքած ՀԷՑ-ի հետ, բայց նրանք կամայականորեն անջատել են մեր հոսանքները՝ ասելով, որ անօրինականություն կա, և որ կարող ենք դիմել դատարան։ Մեկ տարուց ավել է՝ դատական գործն ընթանում է։ Կառավարությունը կամայականությունը տալիս է քաղաքապետարանին և նրանք են որոշելու շարժական սրճարանների գործունեությունը, որը, կարծում եմ՝ ճիշտ չէ։ Ոչ ոք չի կարող երաշխավորել և ոչ ոք չգիտի, թե քաղաքապետարանը հետո ինչպես կվարվի»,- ասաց նա՝ հավելելով, որ իրենց հիմանական պահանջն այն է, որ օրենքին իրական կարգավորում տրվի այլ ոչ թե փոխանցվի ոլորտը քաղաքապետարանին։

Հարցին, թե նախկինում իրենց չի՞ զգուշացվել գործունեության ապօրինի լինել կամ չլինելու մասին, ներկայացուցիչը պատասխանեց․ «Չի կարող համարվել ապօրինի, որովհետև մինչ այս պահը մենք ոչ մի ապօրինի գործողություն չենք իրականացրել, հարկեր ենք մուծել, ՀԷՑ-ի հետ պայմանագրով աշխատել ենք։ Ավելին ասեմ. մինչև հեղափոխությունը ես այս գործունեությամբ զբաղվել եմ, չնայած այն ժամանակ էլ էր քաղաքապետարանը համարում ապօրինի, նույնիսկ եկել և տուգանել էին, բայց ապօրինի էր տուգանքը։ Դատարանի միջոցով ես ապացուցել եմ, որ տուգանքն ապօրինի էր, հաղթել եմ դատը, սակայն քաղաքապետարանը հետո Վերաքննիչ դատարան դիմեց, որտեղ ես, ցավոք, պարտվեցի»,-ասաց Արթուր Ռաֆայելյանը։ Անդրադառնալով նոր իշխանություններին ուղղած իրենց դիմումին, ներկայացուցիչը նշեց, որ քաղաքապետարանի և կառավարության ներկայացուցիչների հետ մի քանի անգամ խոսել են իրենց խնդրի վերաբերյալ։

«Մեր ցանկությունն այն է, որ նրանք հաշվի առնեն մեր կարծիքը, քանի որ մենք մի քանի տարի է՝ զբաղվում ենք այս գործով։ Այնպես չի, որ մենք անօրինական բան ենք անում ու հիմա ուզում են կասեցնել մեր անօրինական գործունեությունը, մեզ օրենքով թույլատրվել է և թույլատրվում է, բայց որոշել են, որ պիտի արգելեն մեր գործունեությունը»,-ասաց նա։ Նշենք, որ բողոքի ակցիայի մասնակիցները վաղ առավոտից սուլոցներով, դհոլներով և ազդանշաններով կոչ էին անում վարչապետին և կառավարության ներկայացուցիչներին, որպեզի հանդիպեն իրենց և հետևողական լինեն խնդրին, բայց նրանց դեռևս ոչ ոք չի մոտեցել։

Սիլվի ՏԻԳՐԱՆՅԱՆ