Ինձ ասաց՝ ես կամ քո փոխարեն պետք է աշխատեմ, կամ՝ որդուդ. Ամբերդի ամրոցի աթոռակռիվը

«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ի՝ Արագածոտնի մարզային ծառայության պետ Մանուկ Մանուկյանն ահազանգում է՝ որդուն ստիպել են ազատման դիմում գրել՝ պատճառաբանելով, թե հանրային պահանջ կա, նույն վտանգը սպառնում է իրեն: ԼՈՒՐԵՐ.com-ի հետ զրույցում Մանուկյանն ասաց, որ 2018 թվականին, առանց որևէ պարզաբանում ներկայացնելու, իր որդուն՝ Սիրակ Մանուկյանին հեռացրել են «Ամբերդի ամրոց» արգելոցի վարիչի պաշտոնից:

«Ինձ  համար բացարձակ անհասկանալի և անհեթեթ է պահանջը իմ տղայի նկատմամբ, հիմա էլ՝ իմ: Երեք ամիս տղայիս ստիպում էին դիմում գրել, առանց որևէ հիմնավոր պատճառաբանություն ներկայացնելու: Տղաս մեկ ամիս արձակուրդ վերցրեց, մտածելով, որ կրքերը կհանդարտվեն: Ներկայացրել են միայն փոխնախարար Տիգրան Գալստյանի պահանջը, որ Սիսակն անպայման պետք է հեռացվի պաշտոնից: Դրանից հետո տղաս տեղի տվեց և ազատման դիմում ներկայացրեց: Բայց մինչև այս ամենը, ես Նիկոլ Փաշինյանին նամակ էի գրել, խնդիրը ներկայացրել, բայց այն պատասխան չի ստացել և մնացել է Մշակույթի նախարարության գզրոցներում»,-ասաց Մանուկ Մանուկյանը:

Մանուկյանի խոսքով՝ նույն վտանգը սպառնում է իրեն, ՊՈԱԿ-ի տնօրեն Արա Թարվերդյանը  ասել է, որ պարտադրում են նկատողություններ տալ Մանուկյանին և ազատել աշխատանքից:

«Երկու օր առաջ ստացել եմ առաջին նկատողությունը, չգիտեմ ինչու: Նույնիսկ ցանկություն չի եղել նկատողության բովանդակությանը ծանոթանալու, ուղղակի հրամանի տակ գրել եմ, որ ցանկություն չունեմ բացատրություն տալու:  Ուզում եմ շեշտել, որ ես անկուսակցական եմ: Իմ կուսակցությունն իմ հուշարձաններն են: Ես ու որդիս պարտաճանաչ աշխատողներ ենք եղել, որդուս 3 անգամ գումարով պարգևատրել են»,-շեշտեց Մանուկ Մանուկյանը:

Հարցին, թե արդյո՞ք այս ամենի մեջ կա որևէ անձնական խնդիր, Մանուկյանը պատասխանեց.

«Կարծում եմ, որ կա անձնական խնդիր, որովհետև իմ աշխատանքային գործունեության ընթացքում, իմ պարտականությունները կատարելիս, որոշակի խնդիրներ եմ ունեցել Բյուրականի համայնքապետի հետ, ով քրեական հանցագործ է և գյուղը դարձրել է ահ ու սարսափի գյուղ: Ես ու որդիս ապրում ենք Բյուրականում: Ես նոր ընտրված վարիչին հարգում եմ, ինքը լավ անձնավորություն է, աշխատում է իր վրա: Երբ մենք հանդիպեցինք, ինձ ասաց՝ «Ես կամ քո փոխարեն պետք է աշխատեմ, կամ որդուդ, ինձ հարմար է, այստեղ եմ գալիս»: Մնացած եզրակացությունները ձեզ եմ թողնում»:

Մանուկյանը չի կարծում, որ այս անգամ էլ նամակն անպատասխան կմնա, բայց եթե նրա հանդեպ սկսվեն անօրինական գործողություններ անել, Մանուկյանը պատրաստ է անցնել բոլոր դատական ատյաններով և պահել իր իրավունքները: