Իրենք, կոնկրետ ասած՝ մեզ հորդորում են չզբաղվել այս գործով

«Մեր հիմնական պահանջն այն է, որ ոնց զանգել են ՀԷՑ-ին, ասել են գնացեք շարժական սրճարանների հոսանքները կտրեք, տենց էլ հետ զանգեն ու ասեն՝ թողեք աշխատեն, հարկերը վճարեն, իրենց գործը չկանգնի, մինչև կառավարությունը նոր օրենքը կընդունի»,- ԼՈւՐԵՐ․com-ի հետ զրուցում ասաց շարժական սրճարաններից մեկի տնօրեն Դավիթ Գեւորգյանը՝ ընդգծելով, որ իրենց գործունեությունը կասեցնելու պատճառով իրենք այս պահին ֆինանսական վնասներ են կրում, եւ ոլորտի 130 մարդ գործազուրկ կանգնած է։

Նրա խոսքով՝ տարիներ առաջ, մինչև բիզնեսը սկսելը, դիմել են Երևանի քաղաքապետարան, Տնտեսական զարգացման և ներդրումների նախարարություն, ՊԵԿ, և, ըստ սրճարանատերերի, այդ գերատեսչությունների կողմից որևէ նկատողություն չի եղել, որ այդ գործունեությամբ չզբաղվեն, քանի որ ապօրինի է։ Այսօր իրականացվող բողոքի ակցիայով նրանք նոր իշխանություններին հորդորում են, որ ստեղծված խնդրին շտապ լուծում տան, քանի որ իրենց բիզնեսը և աշխատողներն են տուժում դրանից։

Հարցին, թե քաղաքապետարանի որոշման մեջ իրենք որևէ առումով դիտավորություն տեսնո՞ւմ են, սրճարանի տնօրենը պատասխանեց․ «Իհարկե, ավելին ասեմ. շրջիկ սրճարանների վերաբերյալ կառավարության նախագծում նաև կա մի կետ, որով աճուրդ է առաջարկվում։ Այսինքն, կարող է գալ մեկ մեծահարուստ, գնել ոլորտը և շարունակի գործունեությունը»,-ասաց նա։

Դիտարկմանը, թե այդպիսով կստացվի մենաշնորհ, արդյո՞ք ճիշտ են ընկալել նախագծի այդ կետը, ցուցարարը պատասխանեց․ «Նախագծի մեջ այդ կետը այնպես է նշված, որ եթե աճուրդը անցնի, որևէ մեկը, մնացած բոլոր շարժական կետերը պիտի հեռացվեն քաղաքի տարբեր հատվածներից և միայն գնորդը կարող է զբաղվել այդ առևտրով»,-ասաց Դավիթ Գևորգյանը։

Հարցին, թե որևէ կերպ չեն հիմնավորել, թե ինչու է նման կետ ներառվել նախագծում, նա պատասխանեց, որ իրենց բողոքը հենց դրան է վերաբերում հիմնականում։ Նրանց խոսքով՝ առաջարկություններով հանդես են եկել քաղաքապետարանում և հակադարձել նրանց, բայց քաղաքապետարանն այսօր կտրուկ քայլերի է գնացել՝ պահանջելով հոսանքազրկել իրենց առևտրի կետերը։

Հարցին, թե քաղաքապետարանից իրենց որևէ մեկը աճուրդի տարբերակ առաջարկե՞լ է՝ իրենց գործունեությունն ապօրինի ճանաչելով հանդերձ, սրճարանի տնօրենը պատասխանեց․ «Այո՛, իրենք հակված են աճուրդի տարբերակին։ Մենք լարվածություն ենք նկատում քաղաքապետարանի և մեր միջև։ Մենք գնում ենք նրանց հետ բանակցությունների, բայց սկզբնական փուլում նույնիսկ չէին էլ գալիս, չէին էլ ներկայանում։ Էկոնոմիկայի նախարարությունից էլ ենք ներկայացուցիչների հրավիրել բանակցությունների, բայց չեն եկել։

Քաղաքապետարանից մեզ հետ զրուցել է Առևտրի վարչության պետը և բառացի կարող եմ ասել, որ իրենք, կոնկրետ ասած՝ մեզ հորդորում են չզբաղվել այս գործով»,-ասաց Դավիթ Գևորգյանը՝ նշելով, որ հոսանքազրկելուց առաջ իրենց ոչ մի զգուշացում չի արվել քաղաքապետարանի կողմից, պարզապես եկել են, անջատել ու գնացել, ինչի հետևանքով սննդամթերքներ են փչանում։

Սիլվի ՏԻԳՐԱՆՅԱՆ