Այսօր Մամուլի ազատության համաշխարհային օրն է

Այսօր` մայիսի 3-ին, մամուլի ազատության համաշխարհային օրն է (World Press Freedom Day): 

1991թ. մայիսի 3-ին Վինդհուքում ՅՈւՆԵՍԿՕ-ի եւ ՄԱԿ-ի կողմից կազմակերպված աֆրիկյան մամուլի անկախության ու բազմակարծության աջակցման հռչակագիրը նշանավորելու համար Միավորված ազգերի կազմակերպությունը այդ տարեթիվը սահմանել է Մամուլի ազատության համաշխարհային օր:

Այդ որոշումն ընդունելուց հետո յուրաքանչյուր տարի մայիսի 3-ին աշխարհի տարբեր երկրներում կազմակերպվում են տարբեր միջոցառումներ, քննարկումներ` ուղղված ազատ մամուլի պաշտպանությանը, աշխարհում մամուլի ազատության գնահատմանը, ինչպես նաեւ մասնագիտական պարտականությունների կատարման ընթացքում զոհված լրագրողների հիշատակին:

Մամուլի ազատության համաշխարհային օրը միջազգային հանրությանը ամեն տարի հիշեցում է այն մասին, որ մամուլի ազատությունը եւ մտքերի ազատ արտահայտումը այն հիմնական իրավունքներն են, որ ամրագրված են Մարդու իրավունքների համընդհանուր հռչակագրում։ Մենք պետք է պաշտպանենք այդ իրավունքները, քանի որ դրանք ժողովրդավարության հիմքն են եւ իրական ազդեցություն են թողնում աշխարհի բոլոր մարդկանց կյանքի վրա։