ԵՄ համաձայնագրերի ամեն մի կետ խոսում է հօգուտ Արցախի բնակիչների. Հովհաննես Իգիթյան

«Արմեն Աշոտյանն իրավունք ունի սխալ հասկանալու, ինքը քաղաքական գործունեությամբ քիչ է զբաղվում»,- այս մասին Աժ-ում լրագրողների հետ զրույցում ասաց «Իմ քայլը» խմբակցության պատգամավոր Հովհաննես Իգիթյանն` անդրադառնալով իր հայտարարության վերաբերյալ՝ Արմեն Աշոտյանի գրառմանը:

Իգիթյանը նշեց, որ խոսքը վերաբերվել է նրան, որ այն պայմանավորվածությունները, որոնք ձեռք են բերել նախագահները` Մինսկի խմբի շրջանակներում` Ադրբեջանը չի կատարում. «Թե' Մինսկի խմբի շրջանակներում Հայաստանի և Ադրբեջանի ղեկավարների հանդիպման ժամանակ, թե' երկու ԱԳ նախարարների հանդիպումների ժանանակ ձեռք է բերվել պայմանավորվածություն, որ չի լինելու միմյանց ուղղված ատելության խոսք, ռազմատենչ հայտարարություններ, սակայն Ադրբեջանը ոչ միայն զերծ մնաց դրանից, այլև վերջերս մեր հյուսիսային սահմանին եղել են նրանց կողմից պատճառված անհանգստություններ, նաև տեղի բնակիչներին: Մենք պետք է վերահսկողություն ունենանք Ադրբեջան-Հայաստան սահմանին, որպեսզի ունենանք փաստեր, որ Ադրբեջանն անընդհատ խախտում է պայմանավորվածությունները: Ես չեմ բացառում, որ Մինսկի խմբի շրջանակներում լինի այլ` ավելի ուժեղ պարտավորություն, որ Ադրբեջանը չշարունակի նման գործողությունները, որովհետև եթե Ադրբեջանը շարունակի՝ անհնար կլինի այն բանակցությունները, որոնք մենք ընդհանուր ուժերով փորձում ենք անել»,- ասաց Իգիթյանը:

Հարցին, թե նա վտանգ չի՞ տեսնում, այն առումով, որ Ադրբեջանը շարունակում է դիրքերն ամրացնել, Իգիթյանը պատասխանեց. «Գիտենք, թե ինչ է իրենից ներկայացնում Ադրբեջանը, կտրուկ չի փոխվել, և թվում է, թե անում են հայտարարություններ, որոնք ուղղված են խաղաղությանը: Գործադիրն անում է իր աշխատանքը, Արցախի պաշտպանության համակարգն՝ իրենը: Բանակն է այն երաշխիքներից մեկը, որ կարող է զերծ պահել այդ երեք տարի առաջ դրսևորված ագրեսիայից»,-ասաց նա:

Անդրադառնալով նրան, թե ինչ համապատասխան քայլեր է ձեռնարկում հայկական կողմը, Հովհաննես Իգիթյանն ասաց. «Ադրբեջանը շարունակում է անել այն, ինչ նախկինում, իսկ մենք ստեղծում ենք մթնոլորտ, որ այդպիսի գործողությունները դատապարտվեն և չընդունվեն որպես բանակցային փուլին նպաստող գործողություններ: Այդ գործն արվում է թե՛ ԵԽ մակարդակով, թե՛ բարեկամության խմբերի, թե՛ այստեղ այցելած գործընկերների մակարդակով»:

Նրա խոսքով` եղել է համապատասխան հայտարարություն, որը գնահատական է, իսկ բոլոր օղակներով Ադրբեջանի գործողությունները ներկայացվում են, ու պարզ է, որ միջազգային հանրությունն իր գնահատականը կտա: Չի նշանակում, որ գործընթացի հիմնական աշխատանքներն այն են, ինչ կատարվում են Արցախի կամ Ադրբեջանի կողմից:

ԼՈւՐԵՐ.com-ի հարցին, թե արդյո՞ք ԵՄ-ն Ադրբեջանի հետ հարաբերությունները չփչացնելու համար, կարող է մայիսի 13-ին ստորագրել համաձայնագիր, որտեղ Արցախի վերաբերյալ մեր շահերից չբխող կետեր կլինեն, քանի որ Ադրբեջանի ԱԳՆ-ն հայտարարել է, թե այդ համաձայնագրում Ադրբեջանի ամբողջականության մասին կետեր կան: Ինչպիսի՞ն է հայկական կողմի դիվանագիտությունն այս առումով, Իգիթյանը պատասխանեց. «Ադրբեջանի հայտարարությունն այնքան կարևոր չէ, ինչքան մեր ու ԵՄ-ի համաձայնագիրը: ԵՄ-ի` բոլոր երկրների հետ ունեցած համաձայնագրերում կան արժեքներ, որոնք, համոզված եմ, որ կան նաև Ադրբեջանի հետ կնքվող համաձայնագրում: Հիմքում դրված է մարդը, իրավունքները, կյանքը, և սրանք հենց այն բոլորն են, որից Ադրբեջանը փորձում է զրկել Արցախի բնակչությանը: Համաձայնագրերի ամեն մի կետ խոսում է հօգուտ Արցախի բնակիչների»,-եզրափակեց Հովհաննես Իգիթյանը: