ԱՄՆ-ում YouTube-ի աստղը դատապարտվել է 10 տարվա ազատազրկման

YouTube-ի նախկին աստղ եւ երգիչ Օսթին Ջոնսը, որը պատանիների շրջանում մեծ լսարան ուներ, դատապարտվել է 10 տարի ազատազրկման. նա հարկադրել է վեց աղջկա իրեն ուղարկել սեռական բովանդակության տեսանյութեր, տեղեկացնում է Fox News-ը։

Չիկագոյի դատախազները պահանջում էին 11 տարվա բանտարկություն, իսկ Ջոնսի պաշտպանությունը փորձում էր հասնել հինգ տարվա ժամկետի։ 

Ինչպես հայտարարել են մեղադրողները, Ջոնսը իր զոհերի դեմ օգտագործել է նրանց ջահելությունը, թուլություններն ու իր հանդեպ պաշտամունքը, եւ «նա դա արել է նորից ու նորից»։

«Նա աղջիկներին սովորեցրել է ինչ ասել, ինչպես պարել եւ ինչ անել տեսանյութում»,- նշվում է մեղադրական եզրակացությունում։

Իր հերթին, պաշտպանությունը ներողամտություն է խնդրել Ջոնսի հանդեպ՝ հայտարարելով, որ նրա կյանքը «մթագնված է եղել բռնությամբ, ցավով, կորստով եւ մահվամբ»։ Ջոնսի փաստաբաններն ասել են, որ իրենց պաշտպանյալը մանուկ հասակում ենթարկվել է սեռական բռնության։

26-ամյա Օսթին Ջոնսը ամերիկյան Իլինոյս նահանգի բնակիչ է։ Նա ձերբակալվել է 2017-ին։ Դատախազները հայտարարել են, որ մինչ ձերբակալությունը տղամարդը հասցրել էր ինտերնետում շփում հաստատել 30 աղջկա հետ։