Սրճարանից գողացել են համակարգիչ․ փնտրվում է տեսանյութի երիտասարդը

ՀՀ քննչական կոմիտեի ԵՔՔՎ Արաբկիր վարչական շրջանի քննչական բաժնում քննվող քրեական գործի շրջանակում միջոցներ են ձեռնարկվում՝ պարզելու Երևանի սրճարաններից մեկում առերևույթ գողություն կատարած անձանց ինքնությունը: Այդ մասին հայտնում է ՀՀ քննչական կոմիտեն։

2019 թ. մարտի 14-ին Երևանի բնակիչը ոստիկանության Արաբկիրի բաժնում քաղաքացին հաղորդում է տվել այն մասին, որ նույն օրը անհայտ անձինք Երևանում գործող սրճարաններից մեկում գողացել են իր կողմից նշված սրճարանում մոռացված «Մաքբուք Պրո» տեսակի համակարգիչը՝ պատճառելով խոշոր չափերի գույքային վնաս:

Դեպքի փաստով 2019 թ մարտի 23-ին ՀՀ ոստիկանության Արաբկիրի բաժնում հարուցվել է քրեական գործ՝ ՀՀ քրեական օրենսգրքի 177-րդ հոդվածի 2-րդ մասի 2-րդ կետով, որով նախաքննությունն իրականացվում է ԵՔՔՎ Արաբկիր վարչական շրջանի քննչական բաժնում:

Նախաքննության ընթացքում ստացվել է տվյալ սրճարանի անվտանգության տեսախցիկների տեսագրությունը, ենթարկվել զննության:

Քրգործով բազմակողմանի, օբյեկտիվ և լրիվ քննությունն ապահովելու նպատակով միջոցներ են ձեռնարկվում՝ առերևույթ գողությունը կատարած անձանց հայտնաբերելու ուղղությամբ:

Խնդրում ենք նշված անձանց ներկայանալ վարույթն իրականացնող մարմնին կամ ովքեր ճանաչում են նրանց, որեւէ տեղեկություն ունեն նրանց ինքնության կամ գտնվելու վայրի մասին, հայտնեն ՀՀ քննչական կոմիտեի Երևանի քննչական վարչության Արաբկիրի վարչական շրջանի քննչական բաժին: