Աշխատավարձերի բարձրացմամբ քաղաքապետարանին հավելյալ ծախս չի ավելացվում. Վահագն Հովակիմյան

«Նախկին քաղաքապետի ժամանակ, երբ որ հաստիքացուցակը եղել է, այնտեղ եղել են հաստիքներ, որոնք չեն վճարվել: Քաղաքապետարանը ներկայացրել է վճարվող հաստիքների թիվը, որը մոտ 1900 է, դրանք թաղապետարանների և քաղաքապետարանների ենթակայության տակ գտնվող հաստատությունների աշխատակիցներն են»,-ԼՈւՐԵՐ.com-ի հետ զրույցում ասաց «Իմ քայլը» խմբակցության պատգամավոր Վահագն Հովակիմյանը` անդրադառնալով Երևանի քաղաքապետարանի այն հայտարարությանը, որ քաղաքապետարանի 1700 աշխատակիցների աշխատավարձերը բարձրանալու են 30%-ով:

Մեր դիտարկմանը, թե, ըստ ավագանու ընդդիմադիր անդամների, քաղաքապետարանի նոր հաստիքացուցակն ուռճացված է, պատգամավորն արձագանքեց. «Մեր ընդդիմադիր գործընկերները հավանաբար մոռանում են, որ անցյալ տարի, երբ հաստիքացուցակը հաստատվում էր, ավագանին նոր էր կազմավորվել և երկար քննարկելու հնարավորություն չունեին: Եթե չեմ սխալվում, առաջիկայում սպասվում է հաստիքների մշակում»,-ասաց պատգամավորը:

Հարցին, թե արդյո՞ք քաղաքապետարանին պետք է 1700 աշխատակից, չկա՞ն հաստիքներ, որոնք կարող են օպտիմալացվել և դրա արդյունքում բարձրանան մյուսների աշխատավարձերը, քանի որ քաղաքապետ Հայկ Մարությանը ևս ընտրվելուց հետո հայտարարել էր, որ առաջիկա երեք ամիսների ընթացքում օպտիմալացումներ են լինելու, իսկ երեք ամիսը վաղուց անցել է, Վահագն Հովակիմյանը պատասխանեց. «Թե′ պետական կառավարման համակարգում, թե´ քաղաքապետարանում և բոլոր ՏԻՄ-երում, լինելու են օպտիմալացումներ: Կարևորն այն է, որ աշխատողները լինեն մասնագետ և լավ վարձատրվեն: Ես մի բան հաստատ գիտեմ, որ քաղաքապետարանի աշխատակիցների աշխատավարձերի բարձրացմամբ քաղաքապետարանին հավելյալ ծախս չի ավելացվում: Մամուլի քարտուղարը հստակ նաև գրել էր, թե ինչ միջոցներով են լինելու աշխատավարձերի բարձրացումները: Ինչ վատ բան կա նրա մեջ, որ պարգևավճարների ֆոնդի հաշվին միանգամից լինում է աշխատավարձերի բարձրացում, որպեսզի մարդը սպասի ոչ թե պարգևավճարի, այլ աշխատավարձը բարձր ստանա: Լավ կաշխատի, ուրեմն կշարունակի ստանալ, եթե ոչ` կազատվի»,- ասաց Վահագն Հովակիմյանը` վստահեցնելով, որ ամբողջ կառավարման համակարգը պիտի այդպիսին դառնա, որ մարդիկ լավ վարձատրվեն և լավ աշխատեն:

Սիլվի ՏԻԳՐԱՆՅԱՆ